ԼՂՀ նախկին արտգործնախարար, քաղաքական վերլուծաբան Արման Մելիքյանն օրեր առաջ իր գրառումներից մեկում տեսակետ էր հայտնել, թե Հայաստանում կա նոր որակի ընդդիմության ձևավորման հնարավորություն, և որ այդ նոր որակի ընդդիմության առաջնորդը կարող է լինել ՀՀ երկրորդ նախագահ Ռոբերտ Քոչարյանը:
«Առաջին լրատվական»-ը պարոն Մելիքյանից հետաքրքրվեց, թե հաշվի առնելով Քոչարյանի վերջին հարցազրույցները և արձագանքները, ի՞նչ է կարծում՝ նրա վերադարձը քաղաքականություն որքանո՞վ ընկալելի կլինի հասարակության համար, չէ՞ որ նրա անվան հետ բազմաթիվ ոճրագործություններ են կապվում՝ Հոկտեմբերի 27, Մարտի 1… Մեր հարցադրմանն ի պատասխան՝ Ա․ Մելքիյանն ասաց․ «Երբ ասում եմ, որ խորհրդարանում ձևավորվում է նոր որակի ընդդիմություն, ես ամենևին էլ նկատի չունեմ, որ այդ «նոր» ընդդիմությունն ավելի բարձր քաղաքական, բարոյական կամ մասնագիտական որակներ ունի, քան այն ընդդիմությունը, որն իր գործունեությունը կազմակերպում էր Ազատության հրապարակում՝ փորձելով հենվել համակիր քաղաքացիների զանգվածի աջակցության վրա: Այս «նոր» ընդդիմության առանձնահատկությունն այն է, որ վերջինս գոյացել է իշխանական ճամբարի կիսման ճանապարհով և կոչված է չեզոքացնել փողոցային ընդդիմության ազդեցությունը նախ՝ խորհրդարանում (այս մի խնդիրն արդեն իսկ լուծված կարող ենք համարել), իսկ այժմ նաև՝ Ազատության հրապարակում»:
Մեր զրուցակիցը հավելեց, որ այս կարգի «նոր» ընդդիմությունն ընդհանուր առաջնորդի կարիք ունի, քանի որ ո՛չ Դաշնակցությունը, ո՛չ «Բարգավաճ Հայաստանը» իրենց միջից համապատասխան առաջնորդի թեկնածություն առաջադրել չեն կարող․ «Չկա մի այնպիսի քաղաքական գործիչ իրենց շարքերում, որն այսօր երկուստեք ընդունելի լինի նրանց համար և բավարար չափով ազդեցիկ լինի նաև իշխանական կոալիցիայի կուսակցական զանգվածի համար: Պակաս կարևոր չէ նաև պաշտոնական իշխանության ղեկավարի և այս «նոր» ընդդիմության հավանական առաջնորդի ծագումնաբանական նույնականությունը: Ես կարծում եմ, որ «նոր»-երի համար ցանկալի կլինի պարոն Քոչարյանի առաջնորդությունը: Այլ հարց է, որ վերջինիս համար սա կարող է որոշակի առումով քաղաքական salto mortale դառնալ՝ մի գործողություն, որի ռիսկերի գնահատումը շատ դժվար է ու անբարենպաստ, ելքի հնարավորությունները՝ շատ մեծ»:
Մելիքյանն ընդգծեց, որ հասարակության համար այսօրինակ շրջադարձն ընդունելի դարձնելու նպատակով կարող են կիրառվել արդեն իսկ փորձված գործիքներ, որոնք կօգնեն մեղմելու Ռոբերտ Քոչարյանի հանդեպ հանրության մի զգալի հատվածի ունեցած բացասական վերաբերմունքը․ «Այդպիսի գործիքներից կարող է լինել և գաղութացման դեմ ակտիվ պայքարի, և նյութական վիճակի արագ բարելավման վերաբերյալ խոստումներն ու այդ խոստումները կյանքի կոչելուն ուղղված ակտիվ, առարկայական գործողությունները»:
Իր գրառումներից մեկում նախագահի նախկին թեկնածու Արման Մելիքյանը տեսակետ էր հայտնել, որ անհրաժեշտ է «Բարգավաճ Հայաստանի» կառավարման ձևի փոփոխության անհրաժեշտություն: Ըստ նրա՝ պետք է նաև կուսակցության առաջնորդի փոփոխություն: Մեր այն հարիցն, թե կարո՞ղ է արդյոք այդ առաջնորդը լինել Ռոբերտ Քոչարյանը, քանի որ որ հենց նրա անունն է կապվում այդ կուսակցության հետ՝ որպես դրա հիմնադիր, բացի այդ՝ հենց «Բարգավաճ Հայաստանն» է նրա պես քննադատության թիրախ ընտրել ՀՀ կառավարությանը:
«ԲՀԿ-ի կառավարման ձևի փոփոխության անհրաժեշտությունը պայմանավորված է քաղաքական նոր իրողություններով: Ինչպես ՀՀԿ-ն էր ժամանակին հոժար, որ իրեն առաջնորդներ պատվաստվեն՝ հանձինս նախ՝ Վազգեն Սարգսյանի, ապա՝ Սերժ Սարգսյանի, այնպես էլ ԲՀԿ-ն կարող է օգտագործվել համանման քաղաքական վիրահատության նպատակով: Ես չեմ տեսնում դրա համար ոչ մի իրական խոչընդոտ: Իմ տպավորությունն այն է, որ պարոն Ծառուկյանն, առհասարակ, երբևէ հակված չի եղել զբաղվել ակտիվ, ինքնուրույն քաղաքական գործունեությամբ, ինչը գործարար մարդու համար միանգամայն բնական է, սակայն արել է հնարավորը, որպեսզի քաղաքական պատվաստման ենթակա կուսակցական մարմինը ակնհայտ ֆիզիկական արատներ չունենա»,- պատասխանեց Արման Մելիքյանը:
