Հրանտ Դինքի սպանության 7-րդ տարելիցին Անկարայում տեղի է ունեցել «Հրանտ Դինքի սպանությունը 2015-ի հեռանկարին» ոգեկոչման ֆորում, որին Հայաստանից մասնակցել է ԱԺ պատգամավոր Արագած Ախոյանը: Այսօր կայացած մամուլի ասուլիսի ժամանակ այս մասին ասաց ինքը՝ պատգամավորը՝ հավելելով, որ ֆորումը կայացել է հունվարի 18-ին՝ «Անկարայի մտքի ազատության կենտրոնի» և «Արևմտահայոց ազգային համագումարի» կողմից:
«Թուրքական կողմից ֆորումին մասնակցում էին բավական ազդեցիկ դեմքեր՝ պատմաբաններ, Բասքըն Օրանը, գրող-հրապարակախոս Չենգիզ Աքթարը, փաստաբաններ և այլն: Ամեն քայլափոխի լսվում էին «Ցեղասպանություն», «Կոտորած» բառերը: Թուրքերը կարծես փորձ էին անում սրբագրելու իրենց պատմությունը, որն անհնար է առանց Հայոց ցեղասպանության ընդունման: Բոլորն էլ հասկանում են, որ Թուրքիայի ապագան՝ առանց պատմությունը սրբագրելու, անհնար է: Մտածում էի՝ ամենաազդեցիկը կլինի իմ բացման խոսքը, սակայն Դինքի մասին ազդեցիկ ելույթներ եղան հատկապես թուրքական կողմից»,- ասաց նա:
Արագած Ախոյանը տեղեկացրեց, որ հայկական կողմը չի ստորագրել ֆորումի մասնակիցների կողմից ընդունված հայտարարությունը, քանի որ դրանում ներառված կետերը, իրենց կարծիքով, ամբողջական չէին, և իրենք կարող էին ևս մի քանիսն ավելացնել:
«Իհարկե, մենք ունեինք մեր կետերը, սակայն դրանց մասին չբարձրաձայնեցինք, ցանկացանք տեսնել՝ ինչ արձագանք կունենա հայտարարությունը՝ իր նախնական կետերով: Իսկ հայտարարությունը վերնագրված է հետևյալ կերպ. «1915-ի ցեղասպանության և կոտորածների 100-ամյակի շեմին ցեղասպանություն/կոտորածներից տուժած ժողովուրդները՝ հայությունը, պոնտոսի հույները և ասորիներն իրենք պետք է որոշեն, թե ցեղասպանության հանցագործներից ինչ և ինչպես պետք է պահանջել»:
Ըստ այդ հայտարարության՝ պետք է վերականգնվի պատմական ճշմարտությունը, վերջ տրվի պատմության ժխտման գործողություններին, բացահայտվեն և հասանելի դառնան հայերի և հույների անձնագրային և Օսմանյան զինված ուժերի արխիվները, կազմակերպվի Ցեղասպանության ենթարկվածների վերադարձ ու վերաբնակեցում, պետք է բացահայտվեն Ցեղասպանության ընթացքում առևանգված կանանց և որբերի ցուցակները, ինչպես նաև մեղավորները պետք է հավաքական պատասխանատվության ենթարկվեն՝ ներառյալ ներողություն խնդրելը: Նման գաղափարներ տարածող Թուրքիայի շատ քաղաքացիներ բազմաթիվ տարիներ անցկացրել են բանտերում»,- ասաց Արագած Ախոյանը:
