Թեհրանի և «վեցյակի» միջև իրանական «միջուկային դոսյեի» կարգավորման շուրջ ձեռք բերված միջանկյալ համաձայնագիրն այսօր մտնում է ուժի մեջ՝ հայտնում է ITAR-TASS-ը:
Փաստաթուղթը, որը նախատեսված է 6 ամսվա համար, համաձայնեցվել էր նոյեմբերի վերջին՝ Ժնևում տևական և ոչ հեշտ բանակցություններից հետո, նախարարական հանդիպման ժամանակ: Այնուհետև անցկացվել էին փորձագիտական մակարդակով խորհրդակցությունների մի քանի ռաունդներ՝ տեխնիկական մանրամասները համաձայնեցնելու համար:
Համաձայնագիրը նախատեսում է մի շարք քայլեր Թեհրանի կողմից, որոնց կատարումը թույլ կտա վերացնել միջազգային հանրության առաջնահերթ մտահոգություններն ու ուժեղացնել միջազգային վերահսկողությունը Իրանի միջուկային գործունեության վրա:
Թեհրանը պարտավորվել է նախատեսված ժամանակահատվածում դադարեցնել ավելի քան 5 տոկոս ուրանի հարստացումը, կես տարուց ոչնչացնել մինչև 20 տոկոս հարստացված միջուկային նյութերի ողջ պաշարները, դադարեցնել ցանկացած ցենտրիֆուգների տեղադրումը և ուրանի հարստացման նոր կենտրոնների կառուցումը, դադարեցնել նաև պլուտոնիումի ստեղծման ծրագրի զարգացումը: Արևմտյան երկրներն ի պատասխան պետք է թուլացնեն պատժամիջոցները: Միջանկյալ համաձայնագրի գործողության ընթացքում Իրանը կարող է մոտ 7 մլրդ դոլար ստանալ: Իրանական ակտիվների մնացած մասը՝ մոտ 100 մլրդ դոլար, որոնք սառեցված են արտերկրում, ինչպես նախկինում՝ անհասանելի կմնան: Այսպիսով՝ առաջիկա 6 ամիսներն Իրանի համար կլինեն «փորձնական»:
Առաջիկա օրերին ԵՄ-ն կարող է որոշում ընդունել որոշ պատժամիջոցների գործողությունը դադարեցնելու մասին: Բրյուսելում ծրագրում են դա անել այն բանից հետո, երբ ԱԷՄԳ-ից ստացվի հաստատում առ այն, որ Թեհրանը սկսել է կատարել ժնևյան պայմանավորվածությունները: Հենց այս շաբաթ էլ ԱԷՄԳ-ն կներկայացնի իրանական միջուկային ծրագրի ներկայիս վիճակի վերաբերյալ գնահատականը:
Ինչպես հայտնի է դարձել ITAR-TASS-ին , հունվարի 21-ին Ժնևում կհավաքվեն «վեցյակի» ներկայացուցիչները՝ քննարկելու հետագա քայլերն ու գործողությունների համակարգումը: Նախնական տվյալներով՝ հանդիպումը կանցկացվի առանց Իրանի մասնակցության:
