Ադրբեջանական APA լրատվական գործակալության փոխանցմամբ` Ադրբեջանի արտգործնախարար Էլմար Մամեդյարովը մեկնաբանել է հունիսի 24-ին Կազանում կայացած Ադրբեջանի, Հայաստանի ու Ռուսաստանի նախագահների հանդիպման արդյունքները.
«Ցավում եմ, որ Կազանի հանդիպման ժամանակ սկզբունքային հարցերի շուրջ փոխզիջում տեղի չունեցավ: Դրա պատճառն այն է, որ Հայաստանը, Ադրբեջանից «պահանջելով ավելի մեծ զիջումներ», փորձում է «վնասել» 7 տարի առաջ մեկնարկած բանակցային գործընթացը»:
Մամեդյարովն ընդգծել է, որ Ադրբեջանի, Հայաստանի ու Ռուսաստանի նախագահների հանդիպումները հանդիսանում են բանակցային գործընթացի ամենատևական ձևաչափը. «Հանդիպման ժամանակ քննարկվեցին խնդրահարույց հարցերը, որոնք խոչընդոտում են հակամարտության կարգավորման գործընթացում առաջընթացի գրանցմանը: Նախագահները որոշել են շարունակել ընդհանուր կետերի փնտրտուքը` իրենց դիրքորոշումների մոտեցման համար»:
Հիշեցնենք, որ Էլմար Մամեդյարովն Ադրբեջանի 6-րդ արտգործնախարար է նշանակվել 2004 թվականի ապրիլի 2-ին: Փաստորեն, ըստ Մամեդյարովի` ղարաբաղյան բանակցային գործընթացը մեկնարկել է միայն իր արտգործնախարար նշանակվելուց հետո: