Աֆղանստանի մայրաքաղաք Քաբուլում տեղի ունեցած ահաբեկչության հետևանքով, տարբեր գնահատականներով, զոհվել է 14-16 մարդ, այդ թվում՝ այդ երկրում Արժույթի միջազգային հիմնադրամի ներկայացուցչության ղեկավարն ու ՄԱԿ-ի 4 ներկայացուցիչներ:
Հաղորդվում է, որ ահաբեկիչը պայթեցրել է իրեն Քաբուլի դիվանագիտական թաղամասում գտնվող հայտնի լիբանանյան ռեստորանի մոտ: Ինչպես հայտնում է Associated Press-ը, մահապարտ ահաբեկիչը պայթյուն է իրականացրել ռեստորանի մուտքի մոտ, որից հետո «սև մուտքից» հաստատություն են ներխուժել երկու գրոհայիններ ու կրակ բացել այցելուների ուղղությամբ: Ահաբեկչության պատասխանատվությունը ստանձնել է «Թալիբանը», որի ներկայացուցիչ Զաբիհուլլա Մուջահիդն ընդգծել է, որ պայթյունն ուղղված է եղել օտարերկրացիների դեմ:
Քաբուլում ԱՄՀ ներկայացուցչությունը 2008 թվակաին ղեկավարում է 60-ամյա լիբանանցի Վաբել Աբդալլան: «Դա ողբերգական նորություն է, մենք բոլորս ԱՄՀ-ում ցնցված ենք»,- հայտարարել է հիմնադրամի գործադիր տնօրեն Քրիստին Լագարդը:
ՄԱԿ-ի ԱԽ անդամները ցավակցություն են հայտնել զոհերի հարազատներին, ինչպես նաև ընդգծել հարձակման կազմակերպիչներին ու իրականացնողներին պատասխանատվության ենթարկելու անհրաժեշտությունը: ՄԱԿ ԱԽ-ն նաև աջակցություն է հայտնել երկրում իրավիճակի նորմալացման ջանքերին: «Ոչ մի ահաբեկչական գործողություն չի շեղի Աֆղանստանը խաղաղության, ժողովրդավարության ու կայունության ուղուց»,- ասված է հայտարարության մեջ:
Հարձակումը դատապարտել է նաև ՄԱԿ-ի գլխավոր քարտուղար Պան Գի Մունը: Նա պահանջել է անհապաղ դադարեցնել թիրախային հարձակումները քաղաքացիական անձանց վրա: Նրա խոսքով՝ ահաբեկիչների գործողությունները միջազգային իրավունքի նորմերի կոպիտ խախտում են:
Աֆղանստանի ՆԳՆ տվյալներով՝ զոհերի մեծ մասն օտարերկրացիներ են: Մեծ Բրիտանիայի ԱԳՆ-ն հաստատել է, որ զոհերից մեկը Մեծ Բրիտանիայի քաղաքացի է: Կանադայի արտգործնախարարն էլ հաստատել է երկու կանադացիների մահը:
