«Առավոտ»-ը փորձել է պարզել, թե իշխող ՀՀԿ-ի խոսնակ էդուարդ Շարմազանովն ինչպես է վերաբերվում «Մոսկովսկիե Նովոստի» թերթին տված հարցազրույցում Լևոն Տեր-Պետրոսյանի արած հետևյալ դիտարկմանը, թե Քելբաջարից հետո փակելով սահմանը և փոխկապակցելով այդ երկու հարցերը՝ Թուրքիան վնասեց Ադրբեջանին. «Նրանք ներշնչեցին ադրբեջանցիներին, որ Թուրքիան դաշնակից է, իրենց մեջքին է, և կարող են ավելի անզիջում լինել ԼՂ հարցում: Եվ սա իրոք հանգեցրեց երկրորդ պատերազմին, երբ Ադրբեջանը կորցրեց արդեն 5 շրջան: Սա նաև Թուրքիայի մեղքն է, քանի որ կարող էր ադրբեջանցիներին իրատեսություն ներարկել, համոզել գնալ ինչ-որ զիջումների»:
Էդուարդ Շարմազանովն ի պատասխան ասել է. «Այդ ընթացքում թուրք-ադրբեջանական կապերը բավական սերտ էին, և ամեն ինչ վկայում էր, որ ադրբեջանցիները լուրջ հույսեր էին կապում թուրքական թե՛ ռազմական, թե՛ ֆինանսական, թե՛ խորհրդատվական օգնության հետ: Ըստ իս՝ հենց 1993-ին Թուրքիան կատարեց աոաջին ոչ ճիշտ քայլը, քանի որ, փակելով սահմանը Հայաստանի հետ, առիթ տալով ղարաբաղա-ադրբեջանական հակամարտությունում Քելբաջարի ուղղությամբ առաջընթացի՝ նա փակուղի տարավ այն ժամանակ կարգավորման հնարավորությունը»: Եվ հավելել է՝ «Այստեղ ես համամիտ եմ այդ դիտարկումների հետ»: