Հայաստանի Հանրապետության Վերահսկիչ պալատի կողմից Գիտությունների ազգային ակադեմիայում իրականացրած ստուգումների արդյունքների վերաբերյալ հաշվետվությունում, ինչպես նաև Վերահսկիչ պալատի 2010 թ. տարեկան հաշվետվությունում նշվում է, որ ԳԱԱ պատկերասրահը վարձակալությամբ է տրամադրվել զգալիորեն ցածր գներով և օգտագործվում է ոչ նպատակային։
«Համաձայն 06.02.2003 թվականին կնքված պայմանագրի ՀՀ ԳԱԱ Բաղրամյան 24 հասցեի գրախանութ/պատկերասրահը (423.6 քմ) 63 տարով վարձակալության է հանձնվել «Հեյֆերս Վըրջին Ակադեմիա» ՍՊԸ-ին` տարեկան 3000 ԱՄՆ դոլարին համարժեք դրամ վարձավճարով (մեկ քմ ամսական միջին վարձավճարը կազմում է 180 դրամ), որը հետագայում տրամադրվել է ենթավարձակալությամբ մոտ 9 անգամ ավելի գումարով, տարեկան շուրջ 26,000 ԱՄՆ դոլարին համարժեք դրամով»,- նշված է վերահսկիչ պալատի 2010 թ. տարեկան հաշվետվության մեջ:
Ենթավարձակալության պայմանագրեր «Հեյֆերս Վըրջին Ակադեմիա» ՍՊԸ-ն կնքել է 2003 թվականից «Բրիտանական Խորհուրդ» և 2007 թվականից «Էյչ-Էս-Բի-Սի» բանկի հետ։ Նշենք, որ «Հեյֆերս Վըրջին Ակադեմիա» ՍՊԸ-ն պատկանում է 1996-1997 թթ. ՀՀ վարչապետ, 1998-2000 թթ. Մեծ Բրիտանիայի և Հյուսիսային Իռլանդիայի Միացյալ Թագավորությունում ՀՀ արտակարգ և լիազոր դեսպան Արմեն Սարգսյանին։
2010 թ. ՀՀ նախագահ Սերժ Սարգսյանի Լոնդոն կատարած այցի, ինչպես նաև վերջերս ՀՀ վարչապետ Տիգրան Սարգսյանի Լոնդոն կատարած այցի ժամանակ Ա. Սարգսյանը Բուքինգհեմյան պալատում արքայազն Չարլզի հետ կազմակերպել է դրամահավաք՝ որից գոյացած միջոցներն ըստ պաշտոնական հաղորդագրության ուղղվում են Շոտլանդիայի հարավ-արևմուտքում գտնվող Դամֆիս դղյակի պահպանման և Հայաստանում «Երևան՝ իմ սեր» ծրագրերին։
