Ինչպես գրում է The Wall Street Journal-ը, իտալացի Մարիո Դրագիի նշանակումը Եվրոպական կենտրոնական բանկի ղեկավարի պաշտոնին կարող է հետաձգվել Հռոմի և Փարիզի միջև եղած տարաձայնությունների պատճառով:
Եվրոպական բանկի ղեկավարի հաստատման պրոցեսը տեղի է ունենում մի քանի փուլերով. ԵՄ ֆինանսների նախարարների խորհրդի հաստատումից հետո այս որոշումը պետք է հաստատի նաև ԵՄ էկոնոմիկայի և ֆինանսների խորհուրդը (այսպես կոչված Էկոֆինը), որից հետո այդ հարցն անհապաղ փոխանցվում է Եվրախորհրդարան քննարկման համար: Դրանից հետո իր եզրակացությունը Մարիո Դրագիի հետ կապված կարող է տալ նաև ԵՄ անդամ երկրների ղեկավարների հունիսին կայանալիք գագաթնաժողովը: Վերջնական որոշումը կարող է ընդունվել այս տարվա հուլիսին Եվրախմբի և Էկոֆինի նիստերի ժամանակ:
Մայիսի կեսերին եվրագոտու ֆինանսների նախարարների խորհուրդը հաստատել էր Իտալիայի ԿԲ նախագահ Մարիո Դրագիի թեկնածությունը ԵԿԲ հաջորդ նախագահի պաշտոնին:
Ինչպես պարզաբանում է թերթը, ֆրանսիական իշխանությունները ցանկանում են երաշխիքներ ստանալ, որ Դրագիի ԵԿԲ նախագահ դառնալուց հետո Իտալիան բանկի նախագահների խորհրդում չի ստանա երկու տեղ: Փարիզն ի սրտե ցանկանում է Դրագիին տեսնել ԵԿԲ նախագահի պաշտոնին, սակայն միաժամանակ պնդում է, որ ևս մեկ իտալացի` Լորենցո Բինի Սմագին, որը հանդիսանում է ԵԿԲ նախագահների խորհրդի անդամ, հրաժարվի իր զբաղեցրած պաշտոնից և այն փոխանցի Ֆրանսիային:
