Թուրքական Cumhuriyet թերթի փոխանցմամբ՝ Ստամբուլի կենտրոնական Թաքսիմ հրապարակում և մի շարք այլ շրջաններում քրդերը դուրս են եկել զանգվածային բողոքի ցույցի։ Դրա պատճառն այն է, որ Թուրքայի Բարձրագույն ընտրական խորհուրդը (YSK) որոշել է պատգամավորական մանդատից զրկել Ստամբուլից ընտրված քուրդ նորընտիր պատգամավոր Հաթիփ Դիջլեին։
Քուրդ ցուցարարները երթ են կազմակերպել Ստամբուլի փողոցներով, սակայն ոստիկանությունը արցունքաբեր գազի և ջրցան մեքենաների միջոցով ցրել է նրանց։
Ավելի ուշ ցուցարարների մի մասը նստացույց է արել Թաքսիմ հրապարակում։ Իզմիրում նույնպես բողոքի ակցիա է կազմակերպվել։
Քուրդ մյուս պատգամավորները սպառնում են բոյկոտել առանց Հաթիփ Դիջլեի խորհրդարանի աշխատանքները։
Հիշեցնենք, որ YSK-ն Դիջլեին զրկել է պատգամավորական մանդատից՝ պատճառաբանելով, որ նախկինում նա Ահաբեկչության մասին օրենքով դատապարտված է եղել 1 տարի 8 ամիս ազատազրկման։