Թերթի տեղեկություններով՝ վերջին մեկ տարվա ընթացքում Սերժ Սարգսյանը ԼՂ հարցի հետ կապված գործադիր-փորձագիտական խումբ է ստեղծել, և բանակցային գործընթացի նրբությունները քննարկում է միայն այդ շրջանակի հետ. «Մեր տեղեկություններով՝ խմբի մեջ մտնում են ԱԳ նախարար էդվարդ Նալբանդյանը, Ս.Սարգսյանի աշխատակազմի ղեկավարի տեղակալ Վիգեն Սարգսյանը, ԼՂՀ նախկին նախագահ Արկադի Ղուկասյանը։
Խմբի աշխատանքներին որոշակի պարբերականությամբ մասնակցում է նաև ԱԳ նախարարի տեղակալ Շավարշ Քոչարյանը։ Հետաքրքիրն այն է, որ ԼՂՀ գործող իշխանությունների որևէ ներկայացուցիչ այս խմբում ներգրավված չէ։ ԵԱՀԿ ՄԽ ձևաչափով ընթացող բանակցությունների սեղանի շուրջ Ղարաբաղի իշխանությունների բացակայությունը Ս.Սարգսյանի վարչակազմը բացատրում միջազգային բարդություններով (իրականում բարդություններն առաջացել են միայն այն բանից հետո, երբ Ռ.Քոչարյանն ու Ս.Սագսյանը 1998 թվականին ԼՂՀ-ին ինքնակամ հեռացրել են բանակցային սեղանի մոտից)»,- գրում է «ՀԺ»- ն և հավելում. «Հետաքրքիր է՝ ի՞նչ բարդություն կա փորձագիտական քննարկումներին ԼՂՀ նախագահին և ԱԳ նախարարին ներգրավելու մեջ: Մյուս կողմից՝ ԼՂՀ գործող իշխանություններն էլ կարծես առանձնապես դժգոհ չեն, որ ԼՂ հարցի հետ կապված իրենց տեղեկատվության հիմնական աղբյուրը զանգվածային լրատվության միջոցներն են»:
