Վրաստանը կմտածի անջատողական տարածաշրջանների վրա չհարձակման մասին համաձայնագրի ստորագրման մասին միայն այն բանից հետո, երբ այնտեղից ռուսական զորքերը դուրս բերվեն՝ հայտարարել է Վրաստանի հաշտեցման և քաղաքացիական իրավահավասարության հարցերով նախարար Պաատա Զաքարեիշվիլին: Այս մասին փոխանցում է Trend գործակալությունը:
«Բոլորին առանց այն էլ պարզ է, որ Վրաստանը չի պատրաստվում ուժ կիրառել»,- ասել է նա:
«Երբ նրանք թողնեն այդ տարածքները, նման համաձայնագրի ձևավորումը կդառնա հնարավոր, իսկ մինչ այդ մենք պետք է քննարկենք այլ հարցեր, այլ խնդիրներ, որոնք կուտակվել են, և որոնք շատ-շատ են՝ մարդկանց տեղափոխման խնդիրը, կապերն արտաքին աշխարհի հետ, առևտուրը և շատ այլ հարցեր: Նրանք պարզապես ժամանակ են ձգում, իսկ դա շատ վտանգավոր է հակամարտությունների կարգավորման համար, քանի որ, եթե այդպես շարունակվի, Վրաստանի բնակչությունն ու ողջ աշխարհը կմտածեն, որ աբխազներն ու օսերը չեն ցանկանում խաղաղություն և խաղաղ նախագծեր: Եվ եթե դա այդպես է, ինչո՞ւ ենք մենք ուժ վատնում… Նրանք պետք է օգտվեն պահից»,- հայտարարել է Զաքարեիշվիլին:
