Փոխե՞լ խորհրդարանի ընտրության ժամանակացույցը, թե՞ ոչ: Առա՞ջ բերել ընտրությունը, թե՞ ձեռք չտալ նախնական մտադրությանը, ըստ որի՝ ծրագրվում է խորհրդարանի արտահերթ ընտրությունն անցկացնել 2019-ի գարնանը: Այդ հարցադրումները բավական հրատապ դարձան և հաճախակի սկսեցին հնչել այն բանից հետո, երբ Վերաքննիչ դատարանը փոխեց Ռոբերտ Քոչարյանի խափանման միջոց կալանքը և ազատ արձակեց նրան, ինչը դարձավ հակահեղափոխական մոբիլիզացիայի մասին աշխույժ դատողությունների առիթ: Դրանց շրջանակում էլ սկսեցին կարծիքներ հնչել, որ նոր իշխանությունը պետք է արտահերթ ընտրությունն անցկացնի հնարավորինս շուտ, քանի դեռ հակահեղափոխությունը չի հավաքել մեծ թափ, որովհետև 2019-ի գարնանը արդեն կարող է ուշ լինել: Ռացիոնա՞լ մտահոգություններ են այդ ամենը, թե՞ որոշակի իռացիոնալ խուճապ, կամ, գուցե, այսպես ասած պլանավորվող խուճապ, որովհետև ամենևին չպետք է բացառել, որ այդօրինակ մտքերը կրում են ոչ միայն հեղափոխության հետագա հաջողությամբ ու ամրությամբ մտահոգ քաղաքացիական ու քաղաքական շերտեր, այլ նաև խմբեր, որոնց համար առաջնայինը հանրության շրջանում թերահավատություն, խուճապ, որոշակի իրարանցում առաջացնելն է:
«Առաջին լրատվական»- ի հետ թեմայի շուրջ քննարկմանը մասնակցեցին իրավապաշտպան Արթուր Սաքունցը, քաղաքագետ Էդգար Վարդանյանը և փաստաբան Հովիկ Արսենյանը: Անդրադառնալով դիտարկմանը, որ երկրորդ նախագահ Ռ. Քոչարյանը վերջին շրջանում այսօր արդեն երկրորդ հարցազրույցն է տվել НТВ հեռուստաընկերությանը՝ Է. Վարդանյանը նշեց. «НТВ-ն ամենառեակցիոն և հակաարևմտյան քարոզչական ծրագրով աշխատող հեռուստաալիքն է և համընկնում է Ռ. Քոչարյանի աշխարհընկալումներին և քաղաքական գծին: Սա մտածված քաղաքականություն է. գործում է որոշակի շտաբ, որը կապված է Ռ. Քոչարյանի հետ, դա պրոցես է բայց շատ արհեստականորեն է արվում այդ ամենը, կա՛մ ֆեյքերի, կա՛մ հեղինակություն չունեցող մարդկանց, կա՛մ էլ ցածր մակարդակի լրատվամիջոցների միջոցով է քարոզչություն իրականացվում»:
Քաղաքագետի կարծիքով՝ օգոստոսի 17-ից հետո որոշակի թարմություն է մտցվել քաղաքական դաշտ, նոր գաղափարներ են առաջարկվել և դրանց շուրջ բանավեճ է սկսվել. «Նաև որոշակի գաղափարներին հարվածելու մշակույթ է ձևավորվում նախկին իշխանավորների շրջանում»:
Արթուր Սաքունցի խոսքով՝ տարիներ շարունակ Հայաստանում իրավական համակարգը եղել է քաղաքականացված, և Քոչարյանը փորձ է անում իրենց կողմից փչացած իրավական համակարգը օգտագործել քաղաքական նպատակներով, որպեսզի պատասխանատվությունից խուսափի: «Իրենց փրկությունը իրավական համակարգի քաղաքականացվածությունն է, որովհետև դրանից դուրս, ինչպես ասում են՝ թագավորը մերկ է: Իրենց գաղափարական մերկությունը, գործելակերպի էությունը փորձում են քաղաքական շղարշով ծածկել»,- նշեց իրավապաշտպանը: Նրա դիտարկմամբ՝ արդեն լյուստրացիա է գնում, շատերը կորցնելու բան ունեն. մեծ հարստություն ունեն կորցնելու:
Հովիկ Արսենյանի դիտարկմամբ՝ Քոչարյանը հայ հասարակությանն ասելիք չունի. «Նա գործով է ապացուցել իր բացասական կերպար լինելը: Ըստ էության՝ Քոչարյանը ոճրագործություն է կատարել իր ժողովրդի նկատմամբ»:
Մանրամասն՝ տեսանյութում: