Օրերս վարչապետ Նիկոլ Փաշինյանն ընդունել է «Հարավկովկասյան երկաթուղի» ՓԲԸ գլխավոր տնօրեն Սերգեյ Վալկոյին։ Հանդիպման ընթացքում քննարկվել են ընկերության գործունեությանը, ինչպես նաև վերջինիս ընթացիկ և առաջիկայում նախատեսվող ծրագրերին վերաբերող հարցեր:
«Հարավկովկասյան երկաթուղի» ՓԲԸ իրավաբանական վարչության պետի նախկին տեղակալ Արսեն Մկրտչյանի բնորոշմամբ՝ Սերգեյ Վալկոն պետք է հանդիպեր ոչ թե վարչապետի, այլ քննիչների հետ։
«Հաշվի առնելով այն խախտումներն ու չարաշահումները, որոնք առկա են «Հարավկովկասյան երկաթուղում»՝ նորմալ կլիներ, որ Վալկոն հանդիպեր քննիչների հետ՝ բացատրություններ տալու համար, իսկ աշխատանքային հարցերը քննարկեր տրանսպորտի նախարարության երկաթուղու վարչության պետի տեղակալի հետ, այլ ոչ թե վարչապետի ընդունելությանն արժանանար․ եթե տվյալ մարդը հանդիպում է մեր երկրի ղեկավարի հետ՝ դա խոսում է այն մասին, որ որդեգրված այն քաղաքականությունը, որը նախկինում կար՝ հիմա էլ շարունակվում է, այսինքն՝ Վալկոյի պահվածքն ինչպես հաբռգած եղել է, այդպես էլ մնում է, որովհետև նա գիտի, որ իր թույլ տված խախտումների համար ոչ թե պատասխանատվության է ենթարկվում, այլ հանդիպում է երկրի ղեկավարի հետ, ինչը չափազանց մտահոգիչ է»,- «Առաջին լրատվական»-ի հետ զրույցում ընդգծեց Արսեն Մկրտչյանն ու միևնույն ժամանակ հավելեց․
«Երկու կարևոր հանգամանք եմ ուզում նշել՝ նախևառաջ այն ակտիվները, որոնք փոխանցված են «Հարավկովկասյան երկաթուղու» տնօրինմանն ու կառավարմանը՝ պետք է հաշվառել․ փաստ է, որ կոնցեսիոն ակտիվներն այն ծավալով և այն վիճակով, որով հանձնվել են «Հարավկովկասյան երկաթուղուն»՝ այլևս չեն համապատասխանում հանձնման և ընդունման ակտիվներին, այսինքն՝ դրանք շեշտակիորեն պակասել են։
Երկրորդ կարևոր հանգամանքն այն է, որ արդեն վաղուց ժամանակն է վերանայելու այդ կոնցեսիոն պայմանագիրը, որովհետև մեզ համար բավականին թանկ հաճույք է նման շռայլությունը, երբ այդ ընկերության այսպիսի կառավարման արդյունքում ունենք ոչ արդյունավետ մենեջմենթ, որը վերջում մեզ հանգեցնելու է նրան, որ Հայաստանն այլևս երկաթգիծ չի ունենալու, այսինքն՝ այն պահին, երբ մենք կցանկանանք ինքնուրույն օգտագործել այդ երկաթգիծը՝ չենք ունենա այլևս ոչ շարժակազմ, ոչ էլ այդ տեխնիկական հնարավորությունները»։
Մանրամասները՝ տեսանյութում։
