«Հեղափոխությունը դեսպանատներում շատ բան չի փոխել, որովհետև դեսպանություններն ապահովում են ՀՀ շահերը արտերկրում, իսկ ՀՀ շահերը հիմնականում պահպանվում են: Վարչապետ Ն. Փաշինյանը բազմիցս նշել է, որ հեղափոխությունը աշարհաքաղաքական ենթատեքստ չի ենթադրել, արտաքին քաղաքական ուղղությունները հիմնականում պահպանվել են, արմատական փոփոխություններ չեն եղել, հետևաբար դեսպանությունների աշխատանքի քաղաքական ուղղվածությունը էական փոփոխություններ չի կրել»,- այս մասին «Առաջին լրատվական»- ի հետ զրույցում ասաց Լատվիայում և Էստոնիայում ՀՀ արտակարգ և լիազոր դեսպան Տիգրան Մկրտչյանը: Նրա խոսքով՝ Հայաստանը վարում է բազմավեկտոր քաղականություն. «Փորձում ենք հավասարակշռությունը պահպանել: Մեր հիմնական խնդիրը մեր պետության ինքնիշխանությունը և մեր ժողովրդի արժանապատվությունը պահպանելն է: Արտաքին գերատեսչության հիմնական խնդիրը մեր պետության անվտանգային, քաղաքական և տնտեսական շահերը պաշտպանելն է և առաջ մղելը»:
Դեսպանի խոսքով՝ մենք մեր արժեհամակարգով եվրոպական ժողովուրդ ենք, մերձբալթյան երկրների դիտարկմամբ ևս հայ ժողովուրդը եվրոպական է:
Տ. Մկրտչյանի հավաստմամբ՝ ԵՄ համաձայնագրի առաջին պտուղները մոտ ժամանակներում տեսանելի կլինեն. «Լուրջ բարեփոխումներ են իրականացվում, և շոշափելի արդյունքներ կլինեն: Վիզաների ազատականացումը թեև դրանից բխող, բայց առանձին գործընթաց է, դրա մեկնարկի մասին խոսելը միգուցե դեռ վաղ է»:
Դեսպանի հավաստմամբ՝ Լիտվայում հայ համայնքի ներկայացուցիչների թիվը հասնում է 1300-1400-ի, Էստոնիայում մոտավորապես նույն թիվը կարելի է դիտարկել, իսկ Լատվիայում 2000-ից ավելի: Նրա խոսքով՝ Էստոնիայում հայերի թիվը մեծ է եղել, մեծ թվով ուսանողներ են եղել, նրանց թիվը պակասել է տարբեր պատճառներով:
«Անցյալում՝ թե՛ խորհրդային, թե՛ նախախորհրդային շրջանում հայ ժողովրդի հետ շփումները դրական տպավորություն են թողել էստոնացիների, լատվիացիների լիտվացիների մոտ: Նրանք ԵՄ-ում մեր աջակից երկրներից են:
Մշակութային դիվանագիտությունը մեր այցեքարտն է: Իմ կարծիքով՝ հայկական դիվանագիտական գործունեության մեջ մեր գերհարուստ մշակույթը ներկայացնելը պետք է լինի մեր առաքելություններից գլխավորը: Մշակույթից ավելի արդյունավետ զենք չկա: Դա այն անհրաժեշտ հիմքն է, որի վրա կառուցվում է տնտեսական և քաղաքական երկխոսությունը»,- նշեց Տ. Մկրտչյանը:
Դեսպանի հավաստմամբ՝ էստոնացիները հետաքրքրված են հայաստանյան վերջին շրջանի փոփոխություններով և ցանկանում են հանդիպել Նիկոլ Փաշինյանի հետ:
Մանրամասն՝ տեսանյութում:
