«Այս կարճ ժամանակաընթացքում մենք արդեն հասցրել ենք սովորել, որ մեր դատարաններն արդար են: Եվ կարծում եմ, որ անկախ դատարանը կկայացնի տրամաբանական վճիռ, որը առաջին հերթին պետք է բխի քրեական գործի շահերից»,- «Առաջին լրատվական»-ի հետ զրույցում նշեց իրավապաշտպան Վարդան Հարությունյանը՝ անդրադառնալով այսօր Վարչական դատարանում Ռոբերտ Քոչարյանի կալանավորման վերաբերյալ նրա փաստաբանների բողոքի քննությանը:
ՀՀ ԱԺ պատգամավորների երաշխավորությունները հօգուտ Քոչարյանի իրավապաշտպանը նորմալ է համարում. «Մարդիկ միջնորդություն են ներկայացրել մեկի հետ կապված, որը նրանց համար եղել է ամեն ինչ, և փորձում են կամ հրահանգ են ստացել իրենց մարդկային պարտքը կատարել: Բայց Արցախի պատգամավորների միջնորդությունն ինձ զարմացրեց, որովհետև դա սխալ հասցեով սխալ հասցեատիրոջից եկած նամակ էր»:
Ինչ վերաբերում է Ռոբերտ Քոչարյանի պաշտպանների նկատմամբ հասարակության կողմից հնչեցված վիրավորանքներին, իրավապաշտպանը նկատեց, որ աշխարհի բոլոր հասարակություններում էլ կարող են լինել նման ոչ արդարացի գնահատականներ փաստաբանների հասցեին, երբ խոսքը ծանր հանցագործության մասին է. «Նման հանցագործները միանշանակ չեն ընդունվում հասարակության կողմից, և բնական է, որ նրանց պաշտպանները ևս միանշանակ չեն ընդունվում»:
Վարդան Հարությունյանի խոսքով, սակայն, Հայաստանում սլաքը շատ է թեքվում՝ հանցագործին և փաստաբանին չի կարելի նույնացնել: «Բայց այստեղ մի կարևոր «բայց» կա. փաստաբանը նույնպես իրեն չպետք է նույնացնի հանցագործի հետ. նա չպետք է իր գնահատականները քաղաքականացված ներկայացնի»,- ասաց իրավապաշտպանը՝ հավելելով, որ փաստաբանական ինստիտուտը մեզանում նոր է ձևավորվում և գուրգուրանքի կարիք ունի:
Որպես իրավապաշտպան՝ Վարդան Հարությունյանը նշեց, որ ինքը պատրաստ է պաշտպանել նաև Ռոբերտ Քոչարյանի շահերը, եթե նրա իրավունքները ակնհայտորեն ոտնահարվեն:
Ռոբերտ Քոչարյանի դատապարտման առնչությամբ իրավապաշտպանը նկատեց, որ նա չի կարող միայնակ դատապարտվել՝ դա կլինի անարդարացի հենց Քոչարյանի նկատմամբ. «Բոլոր նրանք, ովքեր սպասարկել են անօրինական հրահանգներն ու հրամանները, պետք է պատժվեն: Մարտի 1-ի արդար դատավճռով կսկսվի Նոր Հայաստանը»:
Մանրամասները՝ տեսանյութում: