Թեյի մեջ մի երկու գդալ շաքար ավելացնելը կարող է մեկ երրորդով մեծացնել Ալցհեյմերի հիվանդության զարգացման հավանականությունը,– հայտարարել են Կոլումբիայի համալսարանի գիտնականները։ Նման եզրահանգում են նրանք արել յոթ տարվա հետազոտությունների արդյունքում։
Իրենց աշխատանքի արդյունքները նրանք ներկայացրել են Ալցհեյմերի հիվանդության դեմ պայքարի ասոցիացիայի Միջազգային գիտաժողովի ժամանակ՝ Չիկագոյում։
Գիտափորձին 2226 մարդ է մասնակցել, որոնք հիվանդության որևէ նախանշան չեն ունեցել։ Գիտափորձի ավարտին հիվանդությունը զարգացել է նրանցից 429-ի մոտ։
Պարզվել է, որ նրանք, ովքեր օրական մոտ 30 գրամ շաքար են օգտագործում, 33%-ով ավելի հակված են Ալցհեյմերի հիվանդություն ձեռք բերելուն։ Ռիսկային գոտում են հայտնվել նաև քաղցր գազավորված ըմպելիքների և մրգահյութերի սիրահարները. նրանց մոտ հիվանդացության հավանականությունը 27%-ով է ավելանում։
Գիտնականների խոսքերով՝ շաքարի ակտիվ օգտագործումը բերում է երկրորդ կարգի շաքարախտի զարգացման։ Իսկ այս հիվանդությունը հետագայում Ալցհեյմերի հիվանդության առաջացման պատճառ է դառնում։
