«Ընդհանրապես Հայաստանում ռուսական ռազմաբազան, ինչպես նաև բոլոր միջազգային բազաները այլ պետության տարածքում, ցավոտ թեմա է։ Ժամանակ առ ժամանակ խնդիրներ են առաջանում, չնչին բաները բարդացվում են և ակտիվ քննարկվում համացանցում. այդ ամենով հանդերձ, հայ-ռուսական ռազմական համագործակցությունը, այդ թվում՝ բազայի հարցում, փոփոխության չի ենթարկվում»,- «Առաջին լրատվական»-ի հետ զրույցում անդրադառնալով Փանիկ գյուղում տեղի ունեցած միջադեպին, ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը։
Քաղաքագետի խոսքերով՝ այս միջադեպը կհարթվի և կմոռացվի. «Հետո նոր մի իրադարձություն կլինի՝ կքննարկվի, իսկ համագործակցության ֆորմատը կլինի նույնը։»։
Ինչ վերաբերում է այն դիտարկումներին, որ ռուսական ռազմաբազան պետք է Գյումրիից դուրս բերվի, Իսկանդարյանը նշում է. «Ես չեմ կարծում, թե նմանատիպ հայտարարությունները կոնկրետ իրադարձությունների հետ են կապված։ Եթե դուք ինձ նախապես հարցնեք՝ այս մարդն ինչ կասի վաղը տեղի ունեցող իրադարձության մասին, ես ձեզ կասեմ։ Այսինքն՝ հայտնի է, թե պարոն իքսն ու իգրեկը ինչ են ասելու։ Պարոն իքսը այդ հարցի շուրջ կասի, որ դա աշխարհի ամենալավ բազան է, պարոն իգրեկն էլ կասի, որ այդ բազան պետք է շտապ դուրս բերել Հայաստանից»։
Մեր զրուցակցի խոսքերով՝ մենք տեսնում ենք, թե Ռուսաստանում ինչ են խոսում Հայաստանի մասին, բայց եթե նայենք, թե ինչ են Հայաստանում խոսում Ռուսաստանի մասին, ապա շատ հաճախ իրենց հրապարակումները բավականին նուրբ և մեղմ կլինեն մեր հրապարակումների համեմատ. «Մոսկվան պատճառ չունի նոր իշխանություններին սիրել, ես ընդհանրապես կասկածում եմ, որ պարոն Պուտինը սիրում է Լուկաշենկոյին կամ Նազարբաևին, Ռուսաստանը պարզապես համագործակցում է Հայաստանի գործող իշխանությունների հետ, և դա շարունակվելու է»։
Հարցազրույցն ամբողջությամբ՝ տեսանյութում։
