Ինչպես և սպասվում էր, Երևանի ավագանու արտահերթ նիստը չկայացավ։ Ավելի վաղ «ՀՀԿ» և «Ելք» դաշինքը հայտարարել էին, որ չեն մասնակցի նիստին։ Պարզ էր, նման իրադրությունում քաղաքապետի պաշտոնում առաջադրված «Երկիր ծիրանի» կուսակցության նախագահ Զարուհի Փոստանջյանի շանսերը զրոյանում էին։ Իսկ ո՞ւմ շանսերն են ավելանում։ Մինչ այս հարցի պատասխանը փնտրելը, հարկ է նկատել գլխավորը՝ Երևանը Հայաստանի մայրաքաղաքն է, կարևորագույն կենտրոն, որն ունի կառավարման ահռելի խնդիրներ: Տարիներ շարունակ այդ խնդիրները ստորադասվել են կառավարման կոռուպցիոն համակարգի խնդիրներին և քաղաքը որպես այդպիսին չի զարգացել, կամ ավելի շուտ կառավարվել է ժամանակին ներդրված հայտնի բանաձևով՝ փողի վրա նստած: Երևանն, ըստ էության, կառավարվել է քրեական օլիգարխիայի տրամաբանությամբ:
Անշուշտ, քաղաքական ներկայիս տրամաբանությունը բացարձակապես համեմատելի չէ այդ տրամաբանության հետ, սակայն Երևանին անհրաժեշտ է քրեականից անցում ոչ թե քաղաքական, այլ քաղաքային տրամաբանության, որպեսզի Երևանի ավագանու համար պայքարը քաղաքական ուժերը մղեն ոչ թե որպես խորհրդարանի արտահերթ ընտրության նախավարժանք, այլ որպես Երևանի քաղաքային կառավարման մրցակցություն: Հնարավո՞ր է արդյոք սահմանել նման նշաձող: Թեմայի շուրջ «Առաջին լրատվական»- ի հետ քննարկմանը մասնակցեցին Երևանի անավագու «Բարև Երևան» խմբակցության նախկին անդամ Գագիկ Բաղդասարյանը, «Ելք» խմբակցության անդամ Անի Սամսոնյանը, քաղտեխնոլոգ Կարեն Քոչարյանը:
Գագիկ Բաղդասարյանի դիտարկմամբ՝ ըստ էության՝ արտահերթ ընտրությունների գնալու վերաբերյալ համաձայնություն կա ոչ միայն քաղաքական ուժերի, այլ նաև հասարակության մեջ. «Նաև կա պահանջ, որպեսզի ավագանին լուծարվի և նոր ավագանու ընտրություններով ընտրվի նոր քաղաքապետ: Կարծում եմ սա է երևանցու ակնկալիքը»:
Բաղդասարյանի խոսքով՝ ՀՀԿ-ն կազմակերպված մի մեծ բանդայանման կառույց էր, որը գործում էր ՀՀ-ում և տարիներ շարունակ կեղեքում էր մեր պետությունը, և շատ ավելի հանցավոր խումբ էր գործում քաղաքապետարանում՝ ի դեմս ՀՀԿ ավագանու ՀՀԿ խմբակցության անդամների և իրենց աշխատանքի:
Կ. Քոչարյանի կարծիքով՝ ՀՀԿ-ն չի մասնակցի Երևանի քաղաքապետի ընտրություններին. «Չի մասնակցի ոչ թե նրա համար, որ հանձնում է իշխանությունը, այլ նրա համար, որ չի ուզենա ԱԺ ընտրություններից առաջ ֆիքսել իրենց հավաքած ձայների տոկոսը, որը լինելու է շատ քիչ: Նրանք պետք է պատրաստվեն ԱԺ ընտրություններին»:
Անի Սամսոնյանի դիտարկմամբ՝ ՀՀԿ-ն ամիսներ առաջ հանձնեց իշխանությունը, իսկ քաղաքապետ Տարոն Մարգարյանի հրաժարականով նահանջում է:
Մեր զրուցակիցների կարծիքով՝ փողը Երևանում միշտ եղել է, բայց այն հոսել է չինովնիկների գրպանը:
Մանրամասն՝ տեսանյութում:
