«Առաջին լրատվական»-ի զրուցակիցն է Արմավիրի քաղաքապետի պաշտոնակատար Դավիթ Խուդաթյանը։
-Պարոն Խուդաթյան, հասցրե՞լ եք ծանոթանալ քաղաքի խնդիրներին։
– Արդեն բավականին հասցրել եմ ծանոթանալ խնդիրներին։ Արմավիրի խնդիրները բազմազան են՝ սկսած բնակարանայինից մինչև զբաղվածության հարցեր, կանաչապատումից ասֆալտապատում, հին սերնդի լուսացույցներն են շատ քաղաքում և այլն։
– Քաղաքապետարանի բյուջեն բավականացնո՞ւմ է այդ խնդիրների լուծման համար։
– Հիմա դա ենք փորձում կարգավորել։ Բյուջեի միջոցները, բնականաբար, բոլոր խնդիրները լուծելու համար չեն բավականացնում։ Մենք փորձում ենք ուղղություններով հասկանալ հիմնական խնդիրները։ Զուգահեռ աշխատանքներ են տարվում նաև մանկապարտեզներում եղած խնդիրների լուծման համար։ Հուլիս-օգոստոս ամիսներին իրականացնելու ենք ասֆալտապատման աշխատանքներ, տեղային փոսալցման աշխատանքներ, կանաչապատման և այլն։
– Ինչպիսի՞ն է բնակչության վերաբերմունքը Ձեր նկատմամբ։ Քաղաքացիների վերաբերմունքը հիմնականում կախված է լինում նաև քաղաքապետերի կուսակցական պատկանելությունից։ Նախորդ՝ ՀՀԿ-ական Ռուբեն Խլղաթյանի դեպքում բնակչությունը պահանջում էր վերջինիս հրաժարականը, քանի որ նա հանրապետական էր։
– Վստահության մակարդակը և՛ մեր թիմի, և՛ անձամբ իմ նկատմամբ բարձր է։ Ես իմ աշխատանքային առաջին օրվանից սկսած որդեգրել եմ թափանցիկության սկզբունքը և ամեն աշխատանքային օրվա վերջում ներկայացնում եմ հաշվետվություն։ Դատելով մեկնաբանություններից՝ մարդկանց համար այս աշխատելաոճն ընդունելի է։ Հարկատուների հաշվին աշխատավարձ ստացող պաշտոնյան պետք է հաշվետու լինի քաղաքացիներին։ Սա ևս վստահություն է առաջ բերում քաղաքացու և պաշտոնյայի միջև։
– Նախկին քաղաքապետերից, հատկապես Ռուբեն Խլղաթյանից ի՞նչ ժառանգություն եք ստացել։
– Այս հաշվով ընդունման-հանձնման գործընթաց է իրականացվում։ Աշխատանքները նոր են սկսվել։ Քաղաքացիները տեսնելու են, որ մենք չենք հարստանալու, մեր անձնական կարիքները առաջ չենք տանելու, մեր ծանոթներին աշխատանքի չենք տեղավորելու։ Քաղաքացիները կհասկանան՝ ես բիզնես ունեցա՞, թե՞ չէ, ինձ հետ փոխկապակցված մարդիկ հարստացա՞ն, թե՞ չէ։ Իսկ նախկին քաղաքապետերի և իշխանությունների գնահատականը տվել են հարյուր հազարավոր քաղաքացիները Հայաստանի փողոցներում։ Իսկ Ռուբեն Խլղաթյանն իրականում այդ իշխանության դեմքն էր Արմավիրում։ Փողոցում սկսածը ժողովրդի ընդհանուր դժգոհության արտահայտումն էր։ Մարդկանց մեջ միայն երկրի նախկին բարձրագույն իշխանության հանդեպ չի եղել անվստահությունը, և հրաժարականը չպետք է սահմանափակվեր միայն Սերժ Սարգսյանով։
Հարցազրույցն ամբողջությամբ՝ տեսանյութում:
