Նախորդ շաբաթ Բեյոնսեն թողարկել է իր նոր ալբոմը: Հատկանշական է, որ առաջին անգամ այն ներկայացվել է ոչ թե որպես երգերի, այլ տեսահոլովակների հավաքածու:
Ալբոմի շուրջ արդեն բազմաթիվ քննարկումներ են սկսվել: Ոմանք այն «ֆեմինիստական» են համարել, քանի որ նախկինում էլ Բեյոնսեն հայտարարում էր, որ ինքը ժամանակակից ֆեմինիստուհի է: Հիմա երգչուհին զերծ է մնում նման հայտարարություններից, բայց չի թաքցնում, որ դրա հիմքում ֆեմինիստական գաղափարներ են:
Վերջերս YouTube-ում հրապարակվել է «Self-Titled Part 2. Imperfection» տեսանյութը, որտեղ Բեյոնսեն պատմել է, թե ինչ մտքեր է ունեցել ալբոմի ստեղծման ընթացքում: Այսպես, խոսելով տեսահոլովակներից մեկի մասին, նա բացատրել է իր կողմից գեղեցկության մրցույթների ու արտաքին տեսքի ցանկացած չափանիշների քննադատությունը:
«Ալբոմի իմաստն այն է, որ գեղեցկություն փնտրեն ոչ իդեալականի մեջ: Հիմա շատ աղջիկներ ձգտում են հաղթել գեղեցկության մրցույթներում, համապատասխանել չափանիշներին: Արդյունքում, նրանք սոված են մնում, չարաշահում են իրենց ծանոթությունները, փորձում են համապատասխանել հանրության սպասելիքներին և, վերջապես, մրցանակ են ստանում: Իսկ արժի՞ այդ ամենը»,- ասում է նա:
Աստղը գիտի, թե ինչի մասին է խոսում, քանի որ վաղ մանկությունից մասնակցել է գեղեցկության մրցույթների:
Երգչուհու նոր ալբոմը բաղկացած է 17 տեսահոլովակներից: Ինչպես ասում է Բեյոնսեն, ինքը երաժշտությունը միշտ ավելի լավ տեսել, քան լսել է:
Ալբոմի վերաբերյալ իրենց հիացմունքն են հայտնել Լեդի Գագան, Քեթի Փերին, Դեմի Լովատոն և Սառա Հայլենդը:
