Ընտրական օրենսգրքի շուրջ ձևավորված ԱԺ աշխատանքային խմբի 2-րդ նիստին առաջարկությունները ներկայացնելու հերթը «Ելք» խմբակցությանն էր:
«Ելքի» առաջարկն այն էր, որ Հանրային ռադիո և հեռուստատեսությամբ բանավեճերի կազմակերպումը լինի պարտադիր, իսկ մասնակցությունը՝ կամավոր: «Եթե մեկը կարող է չգալ, դատարկ աթոռի էֆեկտ կլինի»,-ասաց նա:
ՀՀԿ ներկայացուցիչ Դավիթ Հարությունյանն առաջարկին դեմ էր: «Պատկերացրեք՝ 10 կուսակցություն որոշել է մասնակցել, ինչը ողջամիտ է, սա ենթադրում է 10-ի միջև բանավեճ, որն անարդյունավետ է: Առաջարկում եմ մտածել այլ բան»,-ասաց նա և առաջարկեց, որ նախատեսեն, եթե ցանակացած այլ քանակի քաղաքական ուժեր պայմանավորվում են բանավեճի մասին, ապա Հանրայինը պարտավոր է ապահովել: «Բայց սկզբից քաղաքական ուժերը կորոշեն բանավիճել: Եվ բացի այդ ծանրաքաշերը նույնը չեն, և շատ հնարավոր է՝ ցանկություն չկա՝ մի ավտոբուս էկիպաժը ներկայացնող ուժի հետ բանավիճելու»,-ասաց նա:
