Ճապոնացի մենակյաց Մասաֆումի Նագասակիին, որը Ռյուկյու արշիպելագում՝ Սոտոպանարի անմարդաբնակ կղզում միայնակ ապրել է գրեթե 30 տարի, ստիպողաբար վերադարձրել են մարդկանց մոտ։
Ինչպես հաղորդում է The Mirror պարբերականը՝ նա հաստատվել է կղզում 1989 թվականից։ Այս աբողջ ընթացքում նա հագուստ, կապի միջոցներ, կրակայրիչ չի ունեցել։ Կղզու վրա հազվադեպ ձկնորսներ են հայտնվել, իսկ մնացած ժամանակը տղամարդը անց է կացրել միայնակ։
«Ինչ որ ինձ պետք է, ես կարող եմ այստեղ գտնել, ավել ինձ ոչինչ պետք չէ։ Ես ուզում եմ մահանալ կղզու վրա՝ ոչ մեկին չանհանգստացնելով»,– խոստովանել է նա։
Ամեն առավոտ Նագասակին սկսում էր մարզումներից, ինչից հետո մաքրում էր լողափը։ Սակայն առողջական վատ վիճակի պատճառով տեղի իշխանությունները 82-ամյա տղամարդուն ստիպողաբար վերադարձրել են մարդկանց մոտ։ Նրան տեղավորել են Իսիգակի քաղաքի ծերանոցում, որը կղզուց 60 կմ հեռավորության վրա է գտնվում։
Հայտնի է, որ նախքան տեղափոխվելը նա կին և երկու երեխա է ունեցել և որպես լուսանկարիչ է աշխատել։ Արդյունքում նա որոշել է փախչել մարդկանցից։ Կղզու վրա ապրելիս նա չի կերել միս, ձուկ և կրիայի ձու։
«Ես տեսնում էի, թե ինչպես են կրիաները դուրս գալիս ձվերից և սողում դեպի ջուրը։ Ամեն անգամ մարմինս փշաքաղվում էր։ Այդ պահին ես մտածում էի, թե ինչ հրաշալի է կյանքը»,– պատմել է նա լրագրողներին։
