Բաթումի քաղաքում մոտ հարյուր մարդ է հիվանդանոց ընկել՝ թունավորման կասկածանքով։ Հարսանեկան հանդիսավոր արարողությունը տեղի է ունեցել «Կախաբերի» ռեստորանում, որտեղ հիմա հերքում են տեղի ունեցածի հետ իրենց կապը։
Այս մասին հաղորդում է տեղական Rustavi2 հեռուսաալիքը։ Նշվում է, որ սեղաններն ընդհանուր առմամբ 400 հոգու համար են եղել ։ Ընդ որում, բժիշկները հայտարարել են, որ զանգվածային թունավորման բոլոր պատճառները կարելի կլինի պարզել մի քանի օրից, երբ հայտնի կդառնան փորձագիտության արդյունքները։ Իր հերթին, Հանրային առողջապահության կենտրոնի տնօրեն Նինո Նիժարաձեն պնդում է, որ հյուրերը կարող էին թունավորվել կրեմային տորթից՝ այն պահպանելու ջերմաստիճանային ռեժիմը խախտելու արդյունքում։
