ICANN ընկերությունը, որը համարվում է համաշխարհային ինտերնետի կարգավորողը և տիրույթներում հասցեներ տրամադրողը, պատրաստվում է հեղափոխական որոշում կայացնել: Այս մասին գրում է The New York Times-ը: Ըստ թերթի տվյալների՝ կարգավորող մարմինը թույլ կտա կայքերի էլեկտրոնային հասցեների տիրույթային .com, .net կամ .org վերջավորությունները փոխարինել ընկերության կամ նախագծի անվանումով, որին նվիրված է այդ կայքը:
Վերլուծաբանները վստահ են, որ Սինգապուրում կայանալիք համաժողվի ժամանակ, որը նվիրված է լինելու ինտերնետ հասցեների անվանումների խնդիրներին, քննարկվելու է դրանց փոփոխության հնարավորության հարցը:
The New York Times-ի փորձագետները կարծիք են հայտնում, որ սրա նկատմամբ առավել մեծ հետաքրքրություն կցուցաբերեն խոշոր ընկերությունները, որոնք շահագրգռված են իրենց ապրանքանիշների հետագա զարգացման գործում: Օրինակ՝ հիմա Երևանի քաղաքապետարանի պաշտոնական կայքի էլեկտրոնային հասցեն կարող է ավարտվել .Yerevan վերջավորությամբ: Կամ գարեջուր արտադրող ընկերությունների կայքերի էլեկտրոնային հասցեները կարող են ավարտվել .beer-ով: