Kommersant.ru-ն հայտնում է, որ դեռևս Հայաստանում տեղի ունեցած իշխանափոխությունից առաջ պաշտպանության նախարարությունը մինչև 2024թ. հետաձգել էր ռուսական Su-30SM բազմաֆունկցիոնալ կործանիչների ձեռքբերման հարցը:
Պայմանագիրը, որով նախատեսվում էր առնվազն մեկ էսկադրիլիա առաքել հայկական օդուժին, ստորագրվել է 2012թ., բայց այդպես էլ ուժի մեջ չի մտել պատվիրատուի ունեցած ֆինանսական դժվարությունների պատճառով: «Կոմերսանտ»-ի փոխանցմամբ՝ Ռուսաստանը ակնկալում է, որ համաձայնագիրը կյանքի կկոչվի Հայաստանի արդեն նոր ղեկավարության օրոք: Վարչապետ Նիկոլ Փաշինյանը արդեն նստել է Su-30SM-ի խցիկում և կոչել է այն «աշխարհում լավագույններից մեկը»:
Հայաստանի կողմից Su-30SM ձեռք բերելու մասին խոսակցությունները վերսկսվեցին այն բանից հետո, երբ Նիկոլ Փաշինյանը Facebook սոցցանցում հրապարակեց մի լուսանկար՝ արված Էրեբունի ռազմական օդանավակայանում տեղակայված ինքնաթիռի խցիկում: «Su-30SM-ը աշխարհում լաբագույն կործանիչներից է . ես արդեն Երևանում եմ»,- գրել է Հայաստանի կառավարության ղեկավարը:
Լրացուցիչ որևէ այլ մանրամասնություն նա չի հաղորդել, նրա գործողությունները չի մեկնաբանել նաև ՀՀ ՊՆ-ն: Սակայն, ըստ ռազմական փորձագետ Լեոնիդ Ներսիսյանի, Երևանի կողմից Su-30SM գնելու վերաբերյալ բանակցությունները առաջընթացի փուլում են գտնվում: