Ռուսաստանի նախագահ Վլադիմիր Պուտինը Դաշնային ժողովին ուղղված ուղերձի ժամանակ հայտարարել է, որ Ռուսաստանը պատրաստ է համագործակցել Ուկրաինայի հետ, որը մեկ անգամ չէ, որ հայտարարել է Մաքսային միությունում դիտորդ դառնալու ցանկության մասին՝ հաղորդում է «Վզգլյադ»-ը:
Պուտինը հիշեցրել է, որ նախքան Կիևում զանգվածային բողոքի ակցիաները՝ Ուկրաինան ցանկություն է հայտնել որպես դիտորդ ներկա լինել Մաքսային միության բոլոր հանդիպումներին, մասնակցել քննարկումներին և նախկինում բազմիցս հայտարարել է ՄՄ-ի առանձին համաձայնագրերին միանալու իր հետաքրքրվածության մասին:
«Մենք ոչ մեկին ոչինչ չենք պարտադրում, սակայն եթե մեր ընկերները ցանկություն ունեն համատեղ աշխատել, մենք պատրաստ ենք շարունակել այդ աշխատանքը փորձագիտական մակարդակով»,- ասել է Պուտինը:
Նա նշել է, որ Ուկրաինայի հետ համագործակցությունը հիմնված է հավասարության և իրական տնտեսական շահի վրա:
«Մենք հետևողականորեն առաջ կտանենք եվրասիական գործընթացը՝ չհակադրվելով մյուս ինտեգրացիոն նախագծերին, այդ թվում, իհարկե, այնպիսի հասուն ինտեգրացիոն նախագծի, ինչպիսին է եվրոպականը»,- հայտարարել է Պուտինը:
Նա նաև հույս է հայտնել, որ Ուկրաինայի քաղաքական ուժերին կհաջողվի դուրս գալ ճգնաժամից:
