ԵՄ ընդլայնման և հարևանության քաղաքականության հարցերով հանձնակատար Շտեֆան Ֆյուլեն մասնակցել է Բրյուսելում տեղի ունեցած Հայաստան-ԵՄ Համագործակցության խորհրդի 14-րդ նիստին: Նիստին հաջորդած մամլո ասուլիսում Ֆյուլեն ասել է.
«Համագործակցության խորհրդի նախկին նիստի հետ համեմատած՝ մեր քննարկումների բովանդակության մեջ, անշուշտ, առկա է տարբերություն՝ հաշվի առնելով Հայաստանի նոր միջազգային պարտավորությունները: Բայց այն, ինչ մնում է նույնը, մեր ցանկությունն ու վճռականությունն են՝ շարունակելու սերտ հարաբերությունները և դրանք առաջ տանելու՝ հիմնվելով մինչ օրս ձեռք բերվածի վրա: Այս լույսի ներքո մենք վերահաստատել ենք մեր երկկողմ հարաբերությունների հիմքին անդրադառնալու, ինչպես նաև հետագա գործընկերության ծավալին ու հավակնություններին հարմարեցնելու համար ԵՄ-Հայաստան հարևանության քաղաքականության գործողութունների պլանի թարմացման անհրաժեշտությունը»,- ասվում է Ֆյուլեի հայտարարության մեջ, որը տարածել է Եվրահանձնաժողովի մամլո կենտրոնը:
Ֆյուլեն նշել է, որ, իրենց կարծիքով, գովասանքի է արժանի Շարժունակ գործընկերության առաջընթացը: Նրա խոսքով՝ այցագրային ռեժիմի պարզեցման և ռեադմիսիայի մասին համաձայնագրերի վավերացումն ավարտված է, և իրենք անհամբերությամբ սպասում են դրանց շուտափույթ ուժի մեջ մտնելուն: «Դա թույլ կտա մեզ խթանելու մարդկանց միջև կապերը, որոնք մեր հետագա համագործակցության կարևոր տարր են»,- ասել է Ֆյուլեն:
«Ուրվագծվել է նոր համատեքստում ԵՄ-Հայաստան հարաբերությունների առաջընթացի ուղին: Այժմ մենք պետք է սկսենք աշխատել այն իրականություն դարձնելու համար: Հայաստանը կարող է ԵՄ հետագա աջակցություն ակնկալել՝ խթանելու քաղաքական, տնտեսական և սոցիալական բարեփոխումները և բարելավելու մարդու իրավունքների և հիմնարար ազատությունների պաշտպանությունը»,- նշել է եվրահանձնակատարը:
Նրա խոսքով՝ հանդիպումը ևս մեկ կարևոր հնարավորոթյուն էր՝ ընդգծելու Քաղաքացիական հասարակության դերը բարեփոխումների գործընթացում: «Մենք ուժեղացրել ենք համագործակցությունն ու Քաղաքացիական հասարակության աջակցությունը: Մենք լիահույս ենք, որ նրանց աշխատանքը նույնպես կկառուցվի վերջին 3.5 տարում ձեռք բերվածի վրա: Մենք լիահույս ենք, որ հիմնարար ազատությունները, մասնավորապես՝ արտահայտվելու ու հավաքների ազատությունը, հետագայում կուժեղացվեն»:
Ֆյուլեն ընդգծել է, որ հատուկ աջակցություն կապահովի Արևելյան գործընկերության քաղաքացիական հասարակության ֆորումի հայ ազգային հարթակին՝ ուժեղացնելու նրա դերն ու բարեփոխումների գործընթացի մոնիտորինգը՝ կառավարության հետ կառուցվածքային երկխոսության կառուցման համար:
Վերջում Ֆյուլեն կոչ է արել կառավարությանը՝ քաղաքացիական հասարակության ներկայացուցիչների, մարդու իրավունքների պաշտպանության ակտիվիստների, մասնավորապես՝ կանանց իրավունքների պաշտպանների համար ապահովել վախից զերծ մթնոլորտ, կոչ է արել նաև հետաքննել անցյալի նման որոշ դեպքերը և համոզվել, որ մեղավորները պատասխանատվության են ենթարկվել:
