Հնդկաստանում տղամարդը սպանել է իր 4-ամյա դստերը, որպեսզի «զոհի» միջոցով հանգստացնի աստծուն: Այս մասին հաղորդում են տեղական ԶԼՄ-ները: Սակայն ավելի ուշ նա ոստիկանությանը հաղորդել է, որ սատանան է ստիպել նրան կտրել իր երեխայի կոկորդը:
Ողբերգությունը տեղի է ունեցել Ջոդխպուրում. 26-ամյա Նավաբ Ալի Կուրեշին մուսուլմանական Ռամադանի ժամանակ որոշել է «զոհաբերություն կատարել»: Այդ օրը նա գնել է քաղցրավենիք և դստերը՝ Ռիզվանին, գայթակղելով՝ տուն բերել, որն այդ ժամանակ գտնվում էր տատիկի մոտ: Ուշ գիշերին տղամարդը աղջկան տարել է առաջին հարկում գտնվող սենյակը, Ղուրանից հատվածներ մեջբերել և կտրել դստեր կոկորդը: Այնուհետև նա նորից քնել է: Այս մասին լրագրողներին հայտնել է Ջոդխպուրի ոստիկանության աշխատակից Ռաջան Դուշյանտը:
Կուրեշիի կինը՝ Շաբանան, վաղ առավոտյան արթնացել է և գտել դստեր անշունչ մարմինը: Ոստիկանությունը խուզարկել է հանցագործության վայրը և Կուրեշիին կանչել հարցաքննության:
Սկզբում տղամարդը փորձել է իր հարազատներին համոզել, թե Ռիզվանին միգուցե կատուն է սպանել, սակայն հետաքննության ընթացքում Կուրեշին ի վերջո խոստովանել է սպանությունը:
«Ես իմ երեխային կյանքիցս շատ եմ սիրում, ես նրան զոհաբերել եմ»,- ոստիկանությունը մեջբերել է տղամարդու խոսքերը: Մուսուլմանը պատմել է, որ ինքը զգացել է, թե ինչպես է սատանան հետապնդել իրեն, երբ նա սպանել է իր դստերը:
