Բրիտանիայի ամենագեր տղամարդը, ով Գինեսի գրքում ընդգրկվելու համար օրական 29 000 կալորիա է օգտագործել, այժմ փորձում է նիհարել, որպեսզի գոնե մեկ տարով երկարացնի իր կյանքը:
Ինչպես հայտնում է բրիտանական Daily Mail տաբլոիդը՝ Բարի Օսթինը 20 տարի առաջ տաքսու վարորդ է աշխատել և ռեգբիով է զբաղվել: Սակայն շուտով նա տարվել է ուտելով, ինչի շնորհիվ էլ հայտնի է դարձել, քանի որ միշտ հաղթել է ուտելու հետ կապված մրցույթներում:
Այդ ուշադրությունից տղամարդը գլուխը կորցրել է և մտքով էլ չի անցել փոխել սնվելու իր սզբունքները:
400 կիլոգրամանոց տղամարդը մինչև 2004 թ. Բրիտանիայի ամենագեր մարդն է եղել: Դրանից հետո այդ տիտղոսը Բարիից խլել է 444 կիլոգրամանոց Փոլ Մեյսոնը:
Իսկ Բարին շարունակել է ուշադրության կենտրոնում մնալ, քանի որ Գինեսի գրքում հայտնվելու համար ավելացրել է իր քաշը:
Մի քանի տարի անց բրիտանացին զղջացել է իր սխալ ձգումների համար, քանի որ առողջության հետ կապված խնդիրներ են առաջացել: 2009 թ. սկսած՝ Բարին, անընդհատ գտնվելով զուգընկերուհու հսկողության տակ, սկսել է արդեն ազատվել ավելորդ քաշից: Սակայն մոր մահից հետո տղամարդը կրկին վերադարձել է իր նախկին կյանքին:
Այդ ամենն անհետևանք չի մնացել. այժմ 46-ամյա Բարին, ով հազիվ է շունչը տեղը բերում, պայքարում է ճարպակալման հետևանքով առաջացած հիվանդությունների դեմ:
Բարին զղջում է, որ ուշ է սկսել պայքարել իր կյանքի համար, սակայն հանձնվել տղամարդը չի պատրաստվում: «Պատմում եմ իմ պատմությունն այն հույսով, որ երիտասարդներն, իմ մասին լսելով, զերծ կմնան շատակերությունից»,- ասել է այժմ արդեն 285 կիլոգրամանոց բրիտանացին:
