Ուկրաինայի առաջին նախագահ Լեոնիդ Կրավչուկը և նախկին նախագահ Լեոնիդ Կուչման գործող նախագահ Վիկտոր Յանուկովիչին ակնարկել են այն մասին, որ հաճախ կամավոր հրաժարականը կարող է քաղաքական ճգնաժամից դուրս գալու ելք դառնալ՝ հաղորդում է Интерфакс-ը:
«Կլոր սեղանի» ժամանակ Կրավչուկը հիշել է, որ երբ ինքը Գերագույն ռադայի նախագահ էր, Կիևում ուսանողները նույնպես պահանջում էին կառավարության հրաժարականը: «Վարչապետն այդ ժամանակ ինքը հեռացավ: Ի դեպ, դա հաճախ տեղի չի ունենում, երբ ինքնակամ են գնում, այլ սպասում են, թե երբ իրենց կստիպեն»,- նշել է նա:
Իր հերթին Կուչման հիշեցրել է, որ Վիտոլդ Ֆոկինը նույնպես հրաժարական է տվել, բայց կամավոր-ստիպողաբար: Նախկին նախագահը հավելել է, որ հիմա քաղաքացիական հասարակությունն ազդանշանի է սպասում նախագահից:
Ավելի վաղ հաղորդվում էր, որ այդ հանդիպման ընթացքում Յանուկովիչը խոստացել է նպաստել «եվրամայդանում» ձերբակալվածների ազատ արձակմանը:
