Երկրում հետհեղափոխական պրոցեսներ են, բուհերում սկսվել են գործընթացներ, ԵՊՀ ուսանողները պահանջում են ռեկտորի հրաժարականը, համընդհանուր փոփոխությունների անհրաժեշտություն է առաջացել: Թեմայի շուրջ «Առաջին լրատվական»- ի հետ զրույցում Մխիթար Սեբաստացի կրթահամալիրի տնօրեն Աշոտ Բլեյանը նշեց. «Ամենամեծ բրենդը, միևնույն է, Հայաստանի փոփոխություններն են, և խորքային փոփոխությունները պետք է կազմակերպել ցնցումայինը ցանցայինի վերածելով: Կար մի գործ, որն իր գործիքներն էր պահանջում, իսկ հիմա մտել ենք ոչ թե հեղափոխական կոմիտեների շրջանը, այլ երևում է Ն. Փաշինյանի հաստատակամությունը երկիրը կառավարելու հարցում, և շատ կարևոր է, որ խոսքը արդեն հանրային կառավարման մասին է, այսինքն՝ բաց, փոփոխությունների հասարակություն է ձևավորվել, և ամեն մեկս՝ անհատ. խումբ, կազմակերպություն, պետք է փորձենք այս հանրային կառավարման մաս կազմել:
Չի կարող հեղափոխությունը չազդել ԵՊՀ-ի, Մխիթար Սեբաստացի կրթահամալիրի կամ որևէ այլ կազմակերպության վրա: Ամեն մեկը կարող է կազմել փոփոխությունների հանրային ցանցի մաս և ինքնակազմակերպվել»:
Անդրադառնալով դիտարկմանը, որ 20 տարվա խնդիրներ են կուտակվել, և ինչ-որ խմբեր կարող են խաթարել երկրի բնականոն կյանքը՝ ստվերելով հեղափոխության բնականոն նպատակը, Ա. Բլեյանը նշեց. «Կա ընդհանուրիս հաղթանակը, որը այս փոփոխությունների հետևողական, խորքային զարգացումն է, միևնույն ժամանակ պետք է բացառենք անհաջողությունը. դա անթույլատրելի է:
ԵՊՀ-ում ընթացող գործընթացի շրջանակում հարգանքի բացակայությունը չեմ կարող ընդունել, բայց միևնույն ժամանակ խնդրի լուծման անհրաժեշտություն կա: Չենք ուզում ոստիկանական երկիր դառնանք, հասարակությունը պետք է ինքն իր մեջ ֆիլտրվի: Ինչո՞ւ պետհամալսարանի ողջ պրոֆեսորադասախոսական կազմը հանդես չի գալիս, ցույց չի տալիս իր ամբողջ ներուժը: Մեզանում բարձրագույն կրթության փոփոխությունները հետին պլան էին մղվել, դա լուրջ բացթողում էր, և մենք հիմա քաղում ենք դրա պտուղները:
Ես չեմ հավատում, որ այս պրոցեսը թելադրված է, ԵՊՀ-ն պետք է օրինակ ծառայի, պետք է ցույց տա, որ ընդունակ ենք օգտագործել այս հնարավորությունը, արագացնել փոփոխությունները, գնալ խորքային ռեֆորմների և ուսանողությանը, ակտիվ, նախաձեռնող խմբերին ներքաշել այդ գործընթացի մեջ: Չպետք է վախենալ փոփոխություններից: Եվ հանկարծ մենք կզգանք դրա բարերար ազդեցությունը»:
Ա. Բլեյանն անդրադարձավ նաև ԿԳ նոր նախարարի՝ կրթության ոլորտում էլիտարիզմի դեմ հռչակված պատերազմին: Նրա դիտարկմամբ՝ էլիտար կոչված դպրոցները բացվել են օրենքի շրջանակում, խնդիրն այն է, որ այդտեղ այնքան էլ ուշադրություն չի դարձվել հանրակրթությանը, որը հավասարների, բաց հասարակության կրթությունն է: Նրա ծոսքով՝ պետք է այդ դպրոցներին հանգիստ թողնել և ուշադրություն դարձնել բուն հանրակրթության վրա:
«Թեև փոփոխությունը մեզ հանեց լռված վիճակից, բայց ունեմ մտահոգություններ»,- նշեց Բլեյանը՝ հավելելով, որ պարզունակ լուծումները մերժելի են:
Հարցազրույցն ամբողջությամբ՝ տեսանյութում:
