«Ես մեծ հույս ունեմ, որ երբ այլևս այլ քաղաքականություն է տարվելու Հայաստանի իշխանությունների կողմից՝ լայն զանգվածներ Սփյուռքում և Հայաստանում կկրկնապատկեն իրենց մասնակցությունն ոչ միայն գումարների տեսքով, այլ նաև մասնակիցների թվով և հիմնադրամը բոյկոտելու այն տարբերակը, որը կար՝ այլևս կդառնա անիմաստ, քանի որ Հայաստանի իշխանությունն այսօր արտահայտում է ժողովրդի կարծիքը և այն այրերը, ովքեր ներգրավված են հիմնադրամի հոգաբարձուների խորհրդի կազմում՝ ունեն ժողովրդի անվերապահ վստահությունը․ սա դրական արդյունք կունենա մեր դրամահավաքների ժամանակ»,- «Առաջին լրատվական»-ի հետ զրույցում նշեց ԱՄՆ-ում «Հայաստան համահայկական հիմնադրամ»-ի գործադիր տնօրեն Սարգիս Քոթանջյանը՝ խոսելով «Հայաստան համահայկական հիմնադրամ»-ի հետագա գործունեության և այս հիմնադրամի նկատմամբ հանրության վստահության մակարդակի բարձրացման մասին։
Սարգիս Քոթանջյանի խոսքերով՝ այն կարծրատիպը, որն այս տարիների ընթացքում ձևավորվել էր Սփյուռքում, թե Սփյուռքը Հայաստանին հարկավոր է միայն իր դրամական միջոցներով՝ եղել է միայն այն պատճառով, որ բոլոր մնացյալ կարևոր գործառույթները, որոնք պետք է Սփյուռքի հետ հարաբերությունների օրակարգում լինեին, ցավոք սրտի, չեն եղել։
«Այն օրակարգը, որն այսօր հռչակվել է վարչապետ Փաշինյանի և իր թիմի կողմից՝ միանշանակ ողջունելի է․ ես կարող եմ ասել, որ ԱՄՆ-ում՝ մասնավորապես Լոս Անջելեսում կա այդպիսի մղում, որ վերադառնան Հայաստան, հայրենադարձության գաղափարը առաջ տանեն, որովհետև, ի վերջո, նաև ամենաբարձր հարթակից հայտարարվեց, որ Հայաստանը պատրաստ է ընդունելու Սփյուռքի ամբողջ ինտելեկտուալ ռեսուրսը, որը համոզված եմ՝ ի շահ կդրվի Հայաստանի Հանրապետության և Արցախի»,-հավելեց մեր զրուցակիցը։
Մանրամասները՝ տեսանյութում։
