«Եթե մեզ հաջողվի ձևավորել երկբևեռ քաղաքական դասավորություն, երբ ժողովրդավարական ուժերը՝ լայն զանգվածների ներկայացուցիչները հանդես գան մեկ դրոշի տակ (բնականաբար Քաղաքացաիական պայմանագիրն է, որը շահել է քաղաքացիների վստահությունը, քաղաքական այլ ուժեր կարող են լրացնել) և օլիգարխիան իր առանձին բևեռով հանդես գա, մենք այդ դեպքում կարող ենք առողջ քաղաքական համակարգ ձևավորել: Եվ հնարավոր կլինի քաղաքակիրթ ճանապարհով, միմյանց լսելով փոխել տնտեսության մեջ առաջացած վիճակը՝ լուծել մենաշնորհների, անօրինական հարստության և այլ խնդիրներ: Այժմ ԱԱԾ-ն անում է այն, ինչ հիմա հնարավոր է, բայց պետք է ինստիտուցիոնալացնել խնդիրը»: Այս մասին «Առաջին լրատվական»- հետ զրույցում ասաց «Ոտքի Հայաստան» քաղաքական շարժման առաջնորդ Անդրիաս Ղուկասյանը, ով հեղափոխության արդյունքում հայտնվել է ազատության մեջ:
Նրա խոսքով վերոնշյալ խնդիրներով միայն ԱԱԾ-ն չէ, որ պետք է զբաղվի, այլ դրանք քաղաքական լուծում են պահանջում, ինչը հնարավոր կլինի ընտրական պայքարի արդյունքում:
«Անհրաժեշտ է պահպանել հեղափոխության արդյունքը և շատ չուշացնել արտահերթ ընտրությունները: Եթե ՀՀԿ-ն ազնիվ լիներ, այսօր ՀՀԿ խմբակցությունն արդեն տրոհված կլիներ»,- նշեց Ա.ղուկասյանը՝ հավելելով, որ նրանց միասնականությունը վկայում է այն մասին, որ նրանք ռևանշի մտադրություն ունեն:
Մեր զրուցակցի դիտարկմամբ՝ տարիներ շարունակ մեր երկրում գործել է հանցավոր համագործակցություն բարձրաստիճան պաշտոնյաների միջև, որոնք տապալել են մեր երկրում սահմանադրական կարգը և իշխանությունը յուրացրել են անօրինական հարստություն ձեռք բերելու շարժառիթով. «Մենք ընդվզում էինք սրա դեմ: Դուրս էինք գալիս փողոց, վտանգի տակ էինք դնում մեր ազատությունը և անվտանգությունը: Մեր իշխանությունները ժողովրդին զրպարտում էին, թե հայերը կոռուպցիոն ժողովուրդ են, ազատամիտ չեն, բայց մեր ժողովուրդը շատ ազատամիտ է և անարդարության նկատմամբ անհանդուրժող ու հավատարիմ՝ արժեքներին»:
«Այժմ քաղաքական միասնության համար հիմքեր են ստեղծված, և դա օգտակար է լինելու»,- նշեց Ա.Ղուկասյանը՝ հավելելով, որ «Ոտքի Հայաստան» նախաձեռնությունը կդառնա կուսակցություն:
Մանրամասն՝ տեսանյութում:
