ԱՄՆ նախագահ Բարաք Օբաման խոստացել է կրկին խստացնել Իրանի նկատմամբ կիրառվող պատժամիջոցները, եթե Իրանը չհետևի Ժնևում ձեռք բերված համաձայնությանը:
«Մենք պատժամիջոցները չենք մեղմացնում, այլ միայն Թեհրանին փոքր պատուհան ենք թողնում: Եթե մոտակա վեց ամիսների ընթացքում Իրանը ցանկություն չհայտնի հետևել «Վեցյակի» հետ ձեռք բերված համաձայնագրին, մենք կվերադառնանք պատժամիջոցներին»,- հայտարարել է Օբաման՝ ելույթ ունենալով Վաշինգտոնի Բրուքինգսի անվան հետազոտական ինստիտուտում:
ԱՄՆ նախագահն ընդգծել է, որ Իրանի դեմ կիրառվող պատժամիջոցները երկրի տնտեսության մեջ լուրջ փոփոխություններ են կատարել: «Իրանական տնտեսության ծավալն անցած տարի կրճատվել է հինգ տոկոսով: Մեր կողմից կիրառվող պատժամիջոցները հանգեցրել են նրան, որ նավթի վաճառքից ստացված Թեհրանի շահույթը կրկնակի կրճատվել է»,- փաստել է Օբաման: Այս մասին հաղորդում է ИТАР-ТАСС-ը:
