Ֆրանսիայի Հայ դատի գրասենյակի տնօրեն Հրաչ Վարժապետյանը «Առաջին լրատվականի» հետ զրույցում, անդրադառնալով օրերս ՅՈՒՆԵՍԿՕ-ում «խաչքարերի արվեստ» լուսանկարչական ցուցահանդեսի բացման արարողության ժամանակ տեղի ունեցած միջադեպին, նշեց.
«Նախ ասեմ, որ հիմնական խնդիրը միայն խաչքարերի տեղանքը նշող գրությունների հեռացումը չէր, այլ նաև սրահից այն քարտեզի դուրսբերման հարցը, որտեղ այսօրվա Ղարաբաղը նշված էր Հայաստանի կազմում»։
Հրաչ Վարժապետյանն առանձնացրեց նաև Հայաստանի եռագույն դրոշի կողքին գտնվող ՄԱԿ-ի դրոշի դուրսբերումը ցուցահանդեսի սրահից, որն, իր կարծիքով, նշանակում է. «ՅՈՒՆԵՍԿՕ-ի կամ այդ շրջանակների համար Ղարաբաղը պետք է լինի Ադրբեջանի կազմի մեջ, և այսկերպ ՄԱԿ-ը կարծես չուզեց «մեղսակից» դառնալ այն նախաձեռնությանը, որը տեղի ունեցավ ՅՈՒՆԵՍԿՕ-ի սրահում»։
Ֆրանսիայի Հայ դատի գրասենյակի տնօրենը կարծում է, որ այս ամենն ունի մեկ պատասխան, մեկ բացատրություն. «21-րդ դարում բոլորիս համար հստակ է, թե «դոլարի» հասկացողությունը, նյութական միջոցները որքան բարեբեր ազդեցություն կարող են ունենալ քաղաքականության ճնշման գործում։ Հավանաբար ՅՈՒՆԵՍԿՕ-ի ղեկավարությունը ընկել է ազերիական լոբբինգի և նյութական ազդեցության տակ»։
Հրաչ Վարժապետյանը հիշեցրեց, որ Ադրբեջանն այսօր արտասահմանում հակահայկական քաղաքականության համար միջոցներ չի խնայում։
Մեր զրուցակիցը նաև տեղեկացրեց, որ ֆրանսահայ ողջ համայնքը՝ անկախ դավանանքի, գաղափարական, տարբերություններից, միասնական ճակատով է դիմակայելու այս հարցին, և «առաջիկա օրերին անպայման բողոքի հրապարակային ելույթներ տեղի կունենան ՅՈՒՆԵՍԿՕ-ի այս քաղաքականության դեմ. ֆրանսահայ համայնքը երբեք աչք չի փակի այս ամենի վրա»։