Սպիտակի աղետալի երկրաշարժից անցել է 25 տարի, որին զոհ գնաց շուրջ 25 հազար մարդ:
«Առաջին լրատվական»-ի հետ զրույցում ՀՀ ԱԻՆ շենքերի և շինությունների սեյսմակայունության բաժնի պետ Գուրգեն Նամալյանն ասաց, որ Սպիտակի երկրաշարժը չէր ունենա այսքան աղետալի հետևանքներ, եթե խորհրդային տարիներին հետևեին շենք-շինությունների կառուցապատման նորմերին:
Նա տեղեկացրեց, որ երկրաշարժից հետո փաստաթղթային առումով մեծածավալ աշխատանք է կատարվել, 1994 թվականին նոր նորմեր են ընդունվել, որոնք լրամշակվել են 2006 թվականին: Ինչ վերաբերում է գործնական քայլերին, ապա ռիսկի նվազեցման ուղղությամբ գործնական քայլեր արել են միայն հյուսիսային շրջաններում՝ մասնավորապես Գյումրիում, Սպիտակում, Վանաձորում և մերձակա գյուղերում. «Այս քաղաքներում սեյսմակայուն շենքերը փլուզվեցին, որը կարելի էր վերականգնել, ամրացվեցին, այժմ այստեղ եթե երկրաշարժ լինի, հավանականությունը, որ ընդհանուր փլուզումներ կլինեն, շատ քիչ է»:
Դրա փոխարեն, նրա տեղեկացմամբ, սեյսմիկ ռիսկը շատ բարձր է Երևանում, որովհետև Երևանը հիմնականում կառուցապատվել է Խորհրդային Միության տարիներին, չեն պահպանվել սեյսմակայունության հաշվարկները: Այժմ Երևանի սեյսմիկ ռիսկը կազմում է 9 բալ և բարձր, հետևաբար այդ շենքերի մեծ մասը խոցելի է. «Սերիական կառուցված շենքեր կան, որոնք կարկասապանելային են, կազմում են բնակֆոնդի 15 տոկոսը: Դրանք համատարած փլուզվեցին Գյումրիում: Կան քարե պատերով շենքեր, նույնպես սերիական, կազմում են բնակֆոնդի 30 տոկոսը և էլի վտանգավոր են»:
Խոսելով նորակառույցների մասին` նա նշեց, որ դրանց նախագծերը հաշվարկվում են 9 բալ և ավելի հաշվարկով, աշխատանքները կատարվում են բավարարից բարձր որակով: Փոխարենը` այդ շենքերը կառուցվում են խիտ, ինչը չի թույլատրվում օրենքով: Կառուցապատման վերաբերյալ օրենքում կան դրույթներ, ըստ որոնց՝ բնակության համար պիտանի թաղամասերի կառուցապատման նախագծերը մշակելիս պետք է ձգտել պարզ կառուցապատման՝ հնարավորինս լայն փողոցներով և մարդկանց բնակեցման փոքր խտությամբ, սակայն Երևանի կենտրոնում հակառակ պատկերն է. «Բնակելի թաղամասերի կառուցման դեպքում երկրորդ, երրորդ կարգի գրունտների վրա կառուցապատումը պետք է իրականացվի հիմնականում 4 հարկ հարկայնությամբ: Երևան քաղաքը սեյսմիկ 3-րդ գոտում է, գրունտներն էլ 2-րդ, 3-րդ կարգի են, այսինքն` այդ բարձրահարկերը խիստ վտանգավոր են»:
Վերադառնալով Սպիտակի երկրաշարժին՝ պրն Նամալյանն ասաց, որ նման երկրաշարժերից Ճապոնիայում զոհվում է 50, ամենաշատը՝ 150 մարդ: Մեզ մոտ ևս այդ թիվը կարող էր փոքր լինել, չանցնել 5 հազարը, սակայն պատկերն այլ եղավ:
