Ադրբեջանական Salam News գործակալության փոխանցմամբ՝ հունիսի 19-ին Բաքու է ժամանում Եվրախորհրդարանի պատվիրակությունը, որը բաղկացած է 9 անձից։ Այս մասին հայտարարել է Ադրբեջանում ԵՄ-ի ներկայացուցչության ղեկավար Ռոլանդ Կոբիան։
Այցի հիմնական նպատակը ԵՄ-Ադրբեջան համագործակցության կոմիտեի նիստին մասնակցելն է։
Բացի այդ, եվրոպացի պատգամավորները մի շարք հանդիպումներ կանցկացնեն Միլլի մեջլիսում (խորհրդարան) և այլ պետական կառույցներում։ Այդ հանդիպումներում քննարկվելու են Եվրոպայի ու Ադրբեջանի միջև համագործակցության հեռանկարները։
Այս կապակցությամբ Ռոլանդ Կոբիան հայտարարել է. «Ասոցիատիվ համաձայնագրի կնքումից հետո Ադրբեջանում ներդրվելու է ազատ առևտրի ռեժիմը։ Այդ համաձայնագրի հիմնական նպատակը ԵՄ-ի և Ադրբեջանի միջև առևտրային կապերի հետագա զարգացումն է։ Սակայն այդ համաձայնագիրը կարող է ուժի մեջ մտնել միայն այն բանից հետո, երբ Ադրբեջանն անդամակցի Առևտրի համաշխարհային կազմակերպությանը (ԱՀԿ)»։
Հիշեցնենք, որ նույն օրը՝ հունիսի 19-ին, Բաքվի կենտրոնում տեղի է ունենալու ադրբեջանական ընդդիմության հանրահավաքը, թեև Բաքվի քաղաքապետարանն այն չի արտոնել։
Ի դեպ, Հայաստանը 2003 թվականին անդամակցել է ԱՀԿ-ին և կարող է վետո դնել ԱՀԿ-ին Ադրբեջանի անդամակցության վրա (ինչպես որ տարիներ շարունակ անում է Վրաստանը Ռուսաստանի անդամակցության պարագայում)։