Այսօր Մամուլի ազգային ակումբը ՀՀ-ում Լեհաստանի Հանրապետության դեսպանության աջակցությամբ անցկացրեց հասարակական-քաղաքական քննարկում՝ «Հայաստանի արտաքին քաղաքական մարտահրավերները. Վիլնյուսից հետո» թեմայի շուրջ: Քննարկմանը մասնակցեցին «Ազատ դեմոկրատներ» կուսակցության մամլո խոսնակ Անժելա Խաչատրյանը, ՀՀՇ գործադիր քարտուղար Կարեն Կարապետյանը, «Ժառանգություն» կուսակցության ներկայացուցիչ Ստեփան Սաֆարյանը, «Հրապարակ» օրաթերթի գլխավոր խմբագիր Արմինե Օհանյանը և հասարակական-քաղաքական գործիչ Լարիսա Ալավերդյանը:
«Հրապարակ» օրաթերթի գլխավոր խմբագիր Արմինե Օհանյանն ասաց, որ եվրոպական ինտեգրացիան ՀՀ-ի համար այլընտրանք չունի: Նրա համոզմամբ՝ ՌԴ-ին հաջողվեց հետաձգել ԵՄ-ի հետ պայմանագրերի ստորագրումը, այնինչ դա ժամանակավոր նահանջ ու սառեցում էր, որը կարճ ժամանակ անց փոխվելու է: Նրա բնորոշմամբ՝ պոստսովետական ՌԴ-ի հետ գնալու ենք մի քանի տարի կամ գուցե մի քանի ամիս, քանի որ գործընթացները գնում են, բանակցությունները՝ շարունակվում, իսկ Վիլնյուսն իրեն փոքր-ինչ հույս է արթնացրել:
«Ես կասկածներ ունեմ, որ ՀՀ-ն սառեցված իրավիճակները պահպանելու նկատմամբ սեր ունի, ստատուս-քվոյի պահպանումը մեր ազգի համար դարձել է գոյավիճակ. դա լավ բանի չի կարող հանգեցնել, քանի որ մենք կորուստներ ենք ունենում»,- ասաց Արմինե Օհանյանը:
Ինչ վերաբերում է ՌԴ նախագահի՝ ՀՀ կատարած պետական այցին, ապա, նրա համոզմամբ, դա պետական այցի ծաղր էր, քանի որ ցանկացած պետական այցի արարողակարգ եթե համեմատենք՝ զուտ արարողակարգի, պայմանավորվածությունների առումով, այս այցը զիջում էր պետական այցերին: Նրա խոսքով՝ երկու երկրների նախագահների տրամադրություններից կարելի էր ենթադրել, թե ինչպիսի պետական այց էր:
«Երկու նախագահներն էլ անկումային տրամադրություն ունեին, և դա նկատելի էր: Սակայն հանկարծ ակտիվացավ նախագահի աշխատակազմի ղեկավարը, ով հրաժարվում է հրապարակային ելույթներից, և Պուտինի այցի դրական ներկայացման բեռը վերցրեց իր ուսերին, ով գրագետ կարողանում է շարադրել մտքերը: Նա շեշտում էր, թե այցի ընթացքում եղան փառահեղ ձեռքբերումներ, սակայն ես չեմ կիսում այդ լավատեսությունը:
Կյանքը ցույց է տվել, որ ՌԴ-ի հետ կապված տնտեսական ծրագրերը կամ ձախողվել են, կամ սառեցվել, ոչ մի լավ բան չեն տվել, աշխատատեղեր չեն ստեղծվել: Միակը երևի «ՀայՌուսգազարդ»-ն էր. խնդիրներ կան երկութուղում, էլեկտրացանցերում:
Վիգեն Սարգսյանի թվարկած փաստաթղթերից շատ բան չեմ կարող մանրամասն ասել, պարզապես «Նաիրիտ»-ի գործարքներն այնպես ներկայացվեցին, թե անվադողերի գործարան է լինելու, սակայն դա բլեֆ է, չկա այդպիսի բան, քանի որ ՌԴ-ն ոչ միայն չի հետաքրքրվել, այլև չի այցելել «Նաիրիտ». դա թղթի վրա էլ մնալու է»,- ասաց Արմինե Օհանյանը՝ շարունակելով, թե ցավալի է, որ մեր իշխանությունը որևէ ուղղություն վերցնելու վճռականություն չի գտնում, քանի որ ներկայիս ուղղությունը երկրի շահերից չի բխում:
