ԱՄՆ-ի, Մեծ Բրիտանիայի ու ևս մի քանի արևմտյան պետությունների ներկայացուցիչներն Անկարայում բանակցություններ են անցկացրել սիրիական իսլամիստական խմբավորումների անդամների հետ, ովքեր կռվում են Բաշար Ասադի դեմ: Սա այսպիսի առաջին շփումն էր, մինչ այդ Արևմուտքը հայտարարում էր Սիրիայի ազատ բանակի կազմի մեջ մտնող աշխարհիկ շարժումներին աջակցելու մասին: Սակայն այդ խմբավորումների ազդեցությունն ընկնում է այնքան արագ, որ Վաշինգտոնն ու նրա դաշնակիցները ստիպված են եղել նոր գործընկերներ փնտրել, որոնց շարքում են նաև նրանք, որոնք ցանկանում են Սիրիայում շարիաթի օրենքներով կառավարում հաստատել: Այս մասին գրում է Kommersant-ը:
Բանակացություններն Անկարայում կազմակերպվել էին Թուրքիայի և Կատարի միջնորդությամբ: Դրանք իսլամական աշխարհի այն երկու պետություններն են, որոնք Սիրիայում քաղաքացիական պատերազմի հենց սկզբից անվերապահորեն աջակցել են ընդդիմությանը, այդ թվում՝ արմատական խմբավորումներին: Ասադի հակառակորդների կողմից Թուրքիայի մայրաքաղաք էին ժամանել վերջերս ստեղծված «Իսլամական ճակատ» դաշինքի անդամները: Փորձագետների կարծիքով՝ այսօր այն միավորում է ընդդիմության մարտիկների առնվազն կեսին:
Դաշինքի քաղաքական ծրագիրը քիչ ընդհանուր բան ունի ժողովրդավարական, աշխարհիկ արժեքների հետ, որոնց աջակցման մասին հայտարարում են արևմտյան առաջնորդները: Դաշինքի անդամները չեն թաքցնում, որ իրենց նպատակն է Սիրիայում իսլամական պետության ստեղծումը, որը կապրի բացառապես շարիաթի օրենքներով:
Կապ հաստատելով «Իսլամական ճակատի» հետ՝ Արևմուտքի դիվանագետները հույս ունեն առավել արմատական «Ջեբհաթ Ալ-Նուսրայի» և «Իսլամական պետությունն Իրաքում և Լևանտում» խմբավորումների հետ նրանց միավորում թույլ չտալ: Նրանք երկուսն էլ բացահայտ հայտարարել են «Ալ-Քաիդայի» հետ կապերի մասին:
Խնդիրն այն է, որ գեներալ Իդրիսին ենթարկվում են ընդդիմադիր խմբավորումների մարտիկների 10-15 տոկոսից ոչ ավելին: Ջիհադականների ջոկատները, որոնք ֆինանսավորում են ստանում Պարսից ծոցի երկրներից, ավելի լավ են զինված և ավելի մարտունակ են, ինչը նրանք բազմիցս ապացուցել են վերջին ամիսներին՝ կիսելով այլ ընդդիմադիր շարժումների հետ ազդեցության գոտիներն «ազատագրված» տարածքներում: