«Առաջին լրատվական»-ի զրուցակիցն է «Ազգային անվտանգություն» կուսակցության նախագահ, խորհրդարանում Սերժ Սարգսյանի նախկին պաշտոնական ներկայացուցիչ Գառնիկ Իսագուլյանը:
-Պարոն Իսագուլյան, երեկ պետական այցով Հայաստան էր ժամանել ՌԴ նախագահ Վլադիմիր Պուտինը: Առհասարակ, ինչպե՞ս եք գնահատում այցը, իշխանության տարած քրտնջան աշխատանքը դրան ընդառաջ:
-Որևէ երկրի առաջին դեմքի այցը Հայաստան անպայման ունի իր նշանակությունը, իսկ եթե մեր երկիր այց է կատարում մեր տարածաշրջանի վրա լուրջ ազդեցություն ունեցող երկրի ղեկավար, ապա, բնականաբար, այդ այցը առավել քան նշանակալի է: Իսկ թե ինչպես էին պատրաստվել մեր իշխանություններն այդ այցին, կարող եմ ասել, որ հարցի հասցեատերը ես չեմ, լավ կանեք` այդ հարցերն ուղղեք դրա համար պատասխանատու անձանց:
–Հայտնի դարձավ, որ Հայաստանը վաճառել է «ՀայՌուսգազարդի» 20 տոկոս բաժնեմասը «Գազպրոմին», ինչի փոխարեն, ՌԴ ղեկավարի խոսքով, ավելի մատչելի գնով գազ կստանանք: Ձեր կարծիքով` արժե՞ր գնալ այդ գործարքին:
-Ես հստակ չեմ կարող արտաբերել այն միտքը, որն ասել է Ռուսաստանի նախագահը, բայց մեր իշխանությունների մեկնաբանություններում հստակ ասվում է, որ 20% բաժնեմասը տրվել է ինչ-որ պարտքի դիմաց: Իսկ գազը մատչելի գնով ստանալու առումով դարձյալ մեր իշխանավորներն արդեն իսկ հայտարարել են, որ այն շարքային սպառողի վրա որևէ ձևով չի անդրադառնալու, և սպառման գինը չի նվազելու: Ինչ վերաբերում է հարցի երկրորդ մասին, կարծում եմ` առանց վաղեմության ժամկետի այս խնդիրները պետք է դառնան հանրության քննարկման առարկա, և երբ կձևավորվեն նոր իշխանություններ, նրանց թիվ մեկ խնդիրը պետք է դառնա բոլոր այս կարգի գործարքների մանրակրկիտ ուսումնասիրությունը` սկսած անկախության հռչակումից մինչ այդ օրը, և եթե պարզվի, որ այդ գործարքներում դյուզն-ինչ չափով խախտվել է մեր պետության ու ազգային շահը, դրանք պետք է համարվեն առ ոչինչ, և դարձյալ առանց վաղեմության ժամկետի, օրենքի ողջ խստությամբ պետք է պատասխանատվության ենթարկվեն գործարքի բոլոր մասնակիցները: Նյութական վնասի մասով, եթե կոնկրետ մեղավորները հանգուցյալ լինեն, պատասխանատվությունը պետք է տարածվի նաև նրանց ժառանգների վրա:
-Այցի կապակցությամբ մայրաքաղաքում բողոքի ակցիաներ մեկնարկեցին, որն ուղեկցվեց ոստիկանության դաժան և բռնի գործողություններով. ինչո՞ւ, իշխանություններն անհանգստանալու կարիք ունե՞ն:
-Ինձ համար այդ օրվա բողոքի ակցիաների իմաստն անհասկանալի է ու անտեղի: Մենք ո՞ւմ և ինչի՞ համար ենք բողոքում: Մենք մեր խնդիրների մեջ այլոց մեղադրելու անիմաստ դրսևորումները պետք է մեկընդմիշտ մոռանանք: Եթե մեր իշխանություններին բան ունեք ասելու, այսօր օրը ավելի պայծառ է ու հաճելի, դուրս եկեք փողոց ու ասեք Ձեր ասելիքը, արեք Ձեր անելիքը: Ինչ վերաբերում է այլ երկրներին ու նրանց ղեկավարներին, որոնք մեր պետության հետ հարաբերություններում, բնականաբար, առաջին հերթին հետապնդում են իրենց երկրների շահը, դա բնական ու գովելի երևույթ է. մենք մեր երկրի ղեկավարներից պետք է պահանջենք նույնը, և եթե նրանք դա չեն անում, դրա գնահատականը մեկն է: Ոստիկանության գործողությունները, իմ դիտարկմամբ, համաչափ են եղել: Որոշակի սրացումներ իհարկե նկատվել են, բայց դրանից իմ գնահատականը նրանց գործողությունների հանդեպ ընդհանուր առմամբ մնում է նույնը:
-Պարոն Իսագուլյան, տեսակետներ կան, որ դժվարացել է հատկապես Հայաստանի պրոռուսական ընդդիմության վիճակը, այս այցով էլ, կարծես, Ռուսաստանի կողմից ևս մեկ անգամ լեգիտիմացավ Սարգսյանը: Համակարծի՞ք եք, որ Ռուսաստանի իշխանությունն իր հայաստանյան «ծրագրերի» հետ այլևս համագործակցություն չի տեսնում:
-Ես կատեգորիկ դեմ եմ պրոռուսական, պրոեվրոպական, պրոարևմտյան ձևակերպումներին` դրանց գաղափարական իմաստով: Այնպես որ, հարցի այս հատվածը ինձ համար անընկալելի է: Մեր իշխանությունների լեգիտիմության մասով ժամանակն է, որ հասկանանք, որ դա ոչ թե ինչ-որ մեկն է շնորհում մեր իշխանավորներին, այլ դա անում ենք մենք ինքներս` մեր գործողություններով, մեր վարքագծով և ամենակարևորը` ինքնակազմակերպման հնարավորությամբ: Եթե հանրության մեծամասնությունը կարծում է, որ իշխանությունները լեգիտիմ չեն, ապա ինքն իրավասու է ՀՀ Սահմանադրությամբ իրեն տրված իշխանությունը իրացնել անմիջականորեն այլ ձևերով ու մեթոդներով, որի դրսևորումը առայժմ չի երևում:
-Լավ, առհասարակ, քաղաքական համակարգի վրա այցելությունը որևէ ազդեցություն կունենա՞։
-Ես այդ հարցի պատասխանը ըստ էության արդեն իսկ տվեցի` ասելով, որ մեր խնդիրները մենք պետք է լուծենք մեր երկրի ներսում: Իհարկե, այսօրվա քաղաքական, տնտեսական, սոցիալական, բարոյահոգեբանական վիճակը Հայաստանում այնպիսին է, որ հնարավոր է արտաքին միջամտության միջոցով ստեղծել որոշակի անկայունություն, բայց քանի որ դրանց տակ գաղափարական որևէ հենք չկա, դրանք հեռանկար ունենալ չեն կարող: Միայն Հայաստանի ներսում և ազգային գաղափարների շնորհիվ է հնարավոր հասնել լուրջ փոփոխությունների:
–Ընդհանրապես, համակարծի՞ք եք արդյոք գուցե ծայրահեղական այն գնահատականների հետ, որ Հայաստանն այլևս Ռուսաստանի գաղութն է, և Պուտինի այցն այստեղ, վերաբերմունքն ու հայտարարությունները միանգամայն ադեկվատ են: Ծաղրական չէ՞այն արտահայտությունը, օրինակ, թե մենք մեր հայ գործընկերների հետևից չենք հասցնում, այնքան արագ են ամեն ինչ անում ՄՄ–ին անդամագրվելու ուղությամբ:
-Ասեմ հետևյալը. այն, որ այցի ընթացքում արտահայտած մտքերը թե՛ Ռուսաստանի ներկայացուցիչների, թե՛ մեր ներկայացուցիչների կողմից բավական հետաքրքիր և ուշադրությանն արժանի են, որոնցով կարելի է տալ բազմաթիվ հարցերի պատասխաններ, միանշանակ է, բայց մեր կողմից մյուս ձևակերպումները` «գաղութացում», «Հայաստանի անկախության վերջ» և այլն, ծայրահեղական են և իրականության հետ որևէ աղերս չունեն:
–Ձեր վերջին հարցազրույցներում ասել էիք, որ պահանջում եք գործող նախագահի հրաժարականը: Շարունակո՞ւմ եք պահանջել:
-Որպեսզի իմ նախորդ ասածը չաղավաղեմ, մեջբերում եմ բառացի. «Ուստի ես դիմում եմ նախագահին` ասելով՝ պարոն նախագահ, կանգնեցրե՛ք այս «беспредел»-ը, մենք կօգնենք Ձեզ, իսկ եթե չեք կարող, ի սեր Աստծո, հրաժարակա՛ն տվեք»: Ահա իմ ասածը, և ես այսօր էլ պատրաստ եմ բառացի կրկնել նույնը:
