ԱՄՆ կենտրոնական հետախուզական վարչության կողմից ամենաորոնվող 10 անձանց մեջ է եղել նաև «օրենքով գող», «Տայվանչիկ» մականունը կրող Ալիմժան Տախտախունովը: Այդ ցուցակը հրապարակել էր Forbes ամսագիրը:
Տախտախունովը երեկ հարցազրույց է տվել «Ազատություն» ռադիոկայանի ամերիկյան ծառայությանը՝ մի քանի ուշագրավ հայտարարություններ անելով: Նա մասնավորապես ասել է, որ ռուսական մաֆիա հասկացությունը հորինված է արևմտյան հատուկ ծառայությունների կողմից:
Նա պատմել է, թե ինչպես է 90-ականների սկզբին տեղափոխվել Ռուսաստան, այստեղ իր առաջին գումարներն աշխատել: Նա ասել է, որ 90-ականների սկզբի Ռուսաստանը կարծես ֆիլմից հանած լիներ՝ հեղափոխություն, պատերազմ: «Այն ժամանակ շատերը, որոնք չէին ցանկանում այդ ամենը տեսնել, լքեցին Ռուսաստանը: Դրանք հիմնականում փող ունեցողներն էին»: Որպեսզի նրանք մնան հսկողության տակ, իրավապահները հորինեցին «ռուսական մաֆիայի» մասին պատմությունը,- կարծիք է հայտնել «Տայվանչիկը»:
Այդ հեռացածների համար արտասահմանում հատուկ ստեղծվում էին «մաֆիայի դեմ պայքարի բաժիններ»: «Ինձ հարցնում էին.
– Փողերդ որտեղի՞ց:
– Աշխատել եմ՝ ասում էի ես:
– Որտե՞ղ եք հարկեր տալիս:
– Ոչ մի տեղ:
– Ինչո՞ւ:
– Որովհետև մենք նման մարմիններ չունեինք:
– Վճարեք մեզ մոտ:
– Ես այն ձեզ մոտ չեմ աշխատել, այլ իմ երկրում:
– Իսկ ինչո՞ւ գումարները բանկերում չեն:
– Մենք բանկեր չունենք,- պատմում է «Տայվանչիկն» իր օտարերկրյա արկածների մասին:
«Նրանց այդպիսի զրույցները դուր չէին գալիս, այդ պատճառով էլ հայտնվեցի այդ ցուցակի մեջ»,- եզրակացրել է «Տայվանչիկը»: