«Հանրապետական» կուսակցության վերնախավն այնքան էլ գոհ չէ Արագածոտնի մարզպետ, ՀՀԿ-ական Սարգիս Սահակյանի գործունեությունից:
– Արագածոտնի մարզը այս տարի մեծ վնասներ կրեց կարկտահարությունից: Գյուղնախարարությունը շատ է խոսում գյուղացուն աջակցելու գյուղատնտեսության ոլորտը բարելավելու մասին: Հետաքրքիր է կարկտահարությունից վնասված Արագածոտնի մարզի բնակիչներին փոխհատուցում տրվե՞լ է:
– Այո, այս տարի մեր մարզը զերծ չմնաց բնության հասցրած վնասներից: Միաժամանակ, մարզը մեկ կարկտահարությամբ չսահմանափակվեց, հետևաբար վնասի չափերը դեռ ճշտվում են: Սակայն մենք քաղաքացիներին աջակցություն տվել ենք: Կարող եմ գրավոր ներկայացնել փաստաթղթեր, որ մարդկանց աջակցություն տրվել է, լավ էլ տրվել է ու կտրվի:
– Գյուղնախարարը տարվա սկզբից խոսում է գյուղացու հոգսը թեթևացնելու մասին, աճի միտումներ էր կանխատեսում: Կարո՞ղ եք մի քանի դրական լուծումներ նշել, որ տարվա սկզբից մինչ օրս գյուղնախարարը իրականացրել է գյուղացիների հոգսերը թեթևացնելու համար:
– Շատ ծրագրեր են իրագործվել և լուծվել: Ամենաառաջնայինը պարարտանյութի շուկան կարգավորվեց: Բացի դրանից, ահագին գյուղատնտեսական գարու սերմնացու տրամադրվեց բնակչությանը, որը բավականին մեծ աջակցություն էր մեր մարզին, ինչի արդյունքում մեր մարզում գարու ցանքատարածքները, հետագայում նաև բերքը զգալի քանակով կավելանան: Թունաքիմիկատների հարցով էլ դաշտը կարգավորվեց: Տարբեր վարկային եղանակներով մոտավորապես, վերջին շաբաթվա տվյալներով, 850 միլիոն ցածր տոկոսադրույքներով գյուղատնտեսությանը վարկավորում տրվեց:
– Ձեր թվարկումներից հետո տպավորություն է ստեղծվում, որ ձեր մարզը այլևս խնդիրներ չունի: Ճի՞շտ եմ հասկացել: Եթե ոչ, որո՞նք են ձեր մարզի առաջնային խնդիրները ներկա պահին:
– Դե ես նշեցի, որ բավականին մեծ ծավալի աշխատանքներ են կատարվել, ու շարունակվում են կատարվել այդ աշխատանքները: Առավել ևս ոռոգման համակարգի վրա բավականին մեծ գումարներ են ներդրվել և անցյալ տարի, և այս տարի, ինչի արդյունքում ոռոգման ջրի կորուստները նվազագույնի են հասցվել: Ճիշտ է, ջրի խնդիրը շարունակում է արդիական մնալ, բայց ներկա պահին Համաշխարհային բանկի ծրագրերով և «Հազարամյակի մարտահրավերներ» ծրագրի շրջանակում 12 գյուղերի ոռոգման ցանցերը վերանորոգվում է և մինչև սեպտեմբերի 1-ը աշխատանքները կավարտվեն:
– Արագածոտնի մարզում լուրեր են տարածվում, թե 2012թ. ԱԺ ընտրություններին մեծամասնական ընտրակարգով թիվ 15 ընտրատարածքում առաջադրվելու է Արագածոտնի ներկայիս մարզպետ Սարգիս Սահակյանի եղբայրը` Նաիրի Սահակյանը: Ավելին` ասում են նաև, որ թիվ 15 ընտրատարածքում Նաիրի Սահակյանի թեկնածությունը պաշտպանելու է «Հանրապետական» կուսակցությունը: (Ստացվում է, որ նա դեմ է դուրս գալու ԱԺ պատգամավոր Խաչիկ Մանուկյանի՞ն):
– Իմ եղբայրը իր թեկնածությունը չի դնելու: Իմ եղբայրը կյանքում չի դնելու իր թեկնածությունը, որովհետև ես «Հանրապետական» կուսակցության անդամ եմ, մարզային կուսակցության նախագահն եմ: Ոնց կորոշի երկրի նախագահը, գործընթացները կզարգանան այդ կարգով: Երկրի նախագահը` «Հանրապետական» կուսակցության նախագահը, ինչ որոշում կկայացնի, մենք պարտավոր ենք ի-րա-գոր-ծե-լու:
– Այստեղ այլ խնդիր կա, քանի որ ասում են, որ ՀՀԿ-ն դժգոհ է Ձեր աշխատանքներից: Իսկ գլխավոր պատճառն այն է, որ ընտրությունների ժամանակ չեք կարողանում իրենց ուզած ձայներն ապահովել, քանի որ Արագածոտնի մարզը ձեզանից առաջ գլխավորած դաշնակցականների կշիռը տվյալ մարզում ավելի մեծ է:
– Դա բացառվում է, որ նման խնդիր լինի: Ինձնից դժգոհելու խնդիր չկա: Արագածոտնի մարզում հանրապետականները բավականին մեծ հեղինակություն ու կշիռ ունեն: Ավելին` իմ բոլոր հնարավորությունները օգտագործելու եմ բարձրացնելու «Հանրապետական» կուսակցության հեղինակությունը, և դա այդպես էլ կլինի:
– Բոլորովին վերջերս դժգոհություններ եղան, որ մարզի բոլոր դպրոցներին կրկեսի տոմսեր եք բաժանել և տնօրեններին հրահանգել դրանք վաճառել՝ մեկ տոմսը 1500 դրամով: Արդյունքում ստիպված է եղել միջամտել ԿԳՆ աշխատակազմի ղեկավար Մհեր Ղազարյանը, ով զանգահարել է Արագածոտնի մարզպետարան և ասել, որ դպրոցներում դադարեցնեն տոմսավաճառությունը: Անգամ միջամտությունից հետո տոմսավաճառությունը դադարեցվել է միայն իր բողոքն արտահայտած դպրոցում, իսկ մյուս դպրոցներում դրանք ակտիվորեն վաճառվել են: Ի՞նչ կասեք այս մասին:
– Ինձ նման հարցերը բացարձակապես չեն հետաքրքրում:
– Այն Ձեր անձին է առնչվում, ինչպե՞ս կարող է Ձեզ չհետաքրքրել: Այս ամենը հերքո՞ւմ եք, թե՞ հաստատում:
– Կրկնում եմ, որ ինձ բացարձակ նման հարցերը չեն հետաքրքրում: Չի հետաքրքրում, որովհետև այն աշխատանքը, որ ես կատարում եմ` «Հանրապետական» կուսակցության և երկրի նախագահի ծրագրային դրույթների հետ կապված, լայնածավալ աշխատանքներ են, որոնց առիթով կարող ենք առանձին հանդիպել: