Գյումրի համայնքի ավագանու նիստում քննարկվում է քաղաքապետ Սամվել Բալասանյանին անվստահություն հայտնելու հարցը: Մինչ նիստի մեկնարկը, քաղաքապետարանի դահլիճի մուտքի մոտ հավաքվել էին քաղաքապետի համախոհները, ովքեր աջակցություն են հայտնում գործող քաղաքապետին:
Մայիսի 14-ին Գյումրու քաղաքապետարանն ավագանու 13 անդամներից ընդունել է քաղաքապետին անվստահություն հայտնելու դիմում: Ի դեպ, նրանցից 10-ը հենց «Բալասանյան» դաշինքից են: Նրանց միացել է մեկ թեկնածու ՕԵԿ-ից, երկուսը՝ ԲՀԿ-ից:
Քաղաքապետին անվստահություն հայտնելու նախաձեռնության խումբը ներկայացրել էր նաև իրենց թեկնածուին՝ ավագանու անդամ գործարար Տիգրան Հովհաննիսյանին, ով արդեն վեց տարի է ավագանու անդամ է:
Նիստի մեկնարկին «ԳԱԼԱ» խմբակցության անդամները նշեցին, որ սա կեղծ օրակարգ է, քանի որ նախաձեռնող խումբը հատուկ է Բալասանյանին անվստահություն հայտնում, որպեսզի նման կերպ կարողանա երկարացնել նրա գործունեությունը ևս մեկ տարով: «ԳԱԼԱ» խմբակցության ավագանու անդամ Լևոն Բարսեղյանն առաջարկեց հարցը հանել օրակարգից:
Թեկնածու Տիգրան Հովհաննիսյանը, անդրադառնալով այն դիտարկմանը, որ այս ընթացքում ինքն ընդհանրապես որևէ գործունեություն չի ծավալել, նշեց, որ ավագանու անդամ լինելու 6 տարվա ընթացքում ստացել է 700 գրավոր և նույնքան էլ բանավոր դիմումներ քաղաքացիներից:
«Վստահ եմ՝ ճիշտ քայլ ենք կատարում»,-նշեց թեկնածուն՝ հավելելով, սակայն, որ չնայած ինքը ևս ստորագրել է անվստահություն հայտնելու դիմումի տակ, այնուամենայնիվ, կողմ է Բալասանյանին: Թեկնածուն հրաժարվեց պատասխանել նիստում հնչեցրած որևէ հարցի:
Ավագանու նիստին բացակա էին ԲՀԿ 6 անդամ, ևս մեկը՝ «Բալասանյան» դաշինքից: ՕԵԿ 2 ավագանիներ հրաժարվեցին մասնակցել քվեարկությանը:
Քվեարկությունը կկայանա ընդմիջումից հետո:
