Ազգային ժողովի ԲՀԿ խմբակցության պատգամավոր Տիգրան Ուրիխանյանը դեկտեմբերի 4-ին կառավարության հետ ԱԺ հարցուպատասխանի ժամանակ անդրադարձ կատարեց պարտադիր կենսաթոշակային համակարգին՝ նշելով, որ դրա վերաբերյալ այս օրերին չափազանց շատ բան է ասվել: Նա նաև նկատեց՝ հասկանում է, որ այս կառավարությունը չի ուզում լսել իր հարցերը (Ուրիխանյանի փոխարեն հարցի իրավունքն ԱԺ-ն փորձում էր տալ հերթագրված հաջորդ պատգամավորին՝ ՕԵԿ-ական Հովհաննես Մարգարյանին):
«Կառավարությունն ու քաղաքական մեծամասնությունն ամեն կերպ փորձում են ցուցադրել՝ ինչքան այն լավն է, ինչքան այն ճիշտ է: Ակնկալելով միավանկ բառից մի քիչ ավելի երկար ու ողջամիտ պատասխան՝ ուզում եմ հարցնել՝ եթե այն այդքան լավն է, կամավոր կուտակային համակարգին մասնակցելու ժամանակաշրջանում կառավարության ներկայացուցիչներից ու նրանց մերձավորներից ո՞ր մեկն է անցել այդ համակարգին, կատարել վճարումներ, որպեսզի կամավոր կերպով ապահովի իր բարեկեցությունը»,- հետաքրքրվեց նա: Ի պատասխան՝ ԱԺ փոխնախագահ Էդուարդ Շարմազանովը նախ տեղեկացրեց, որ հարցի ժամանակը սպառվեց, ապա ռեպլիկի կարգով ասաց, որ դեռևս 2010 թվականին «Բարգավաճ Հայաստան» կուսակցությունը կողմ է քվեարկել կուտակային համակարգի ներդրմանը:
