Նոյեմբերի 21-ից 23-ը Հռոմում անցկացված Եվրոպայի օլիմպիական կոմիտեի գլխավոր համաժողովի աշխատանքները ՀԱՕԿ նախագահ Գագիկ Ծառուկյանն արդյունավետ ու կառուցողական գնահատեց:
ՀԱՕԿ նախագահը Իտալիայից մեկնել է նաև Բելառուսի Հանրապետություն: Մինսկում Գագիկ Ծառուկյանին ընդունել է Բելառուսի նախագահ Ալեքսանդր Լուկաշենկոն:
Վերջին օրերին արտերկրում անցկացված հանդիպումներից Գագիկ Ծառուկյանը գոհ է: Բոլոր հանդիպումներն անցկացվել են բարձր մակարդակով՝ ջերմ ու անմիջական մթնոլորտում: Գագիկ Ծառուկյանը համոզված է՝ առաջին քայլերն ամուր հիմքերի վրա են դրված. առաջիկայում նոր ձեքբերումները տեսանելի կլինեն թե’ մարզաշխարհի ներկայացուցիչներին և թե’ մարզասեր հանրությանը:
Գագիկ Ծառուկյանն այս օրերին բազմաթիվ փոխշահավետ հանդիպումներ է ունեցել տարբեր երկրների սպորտի ղեկավարների հետ. ստորագրվել են երկկողմ համագործակցության 7 համաձայնագրեր:
Նոյեմբերի 22-ին ՀԱՕԿ նախագահը հանդիպել է ազգային օլիմպիական կոմիտեների ասոցիացիայի նախագահ Շեյխ Ահմադ Ալ Ֆահադ Ալ Սաբահի հետ: ՀԱՕԿ նախագահը Ալ Սաբահին հրավիրել է Հայաստան, արաբ գործընկերն էլ Գագիկ Ծառուկյանին փոխադարձ այցով հրավիրել է Քուվեյթ: Գագիկ Ծառուկյանը հանդիպել է նաև միջազգային օլիմպիական կոմիտեի նորընտիր նախագահ Թոմաս Բախի հետ: ՄՕԿ-ի նախագահը նշել է, որ տեղյակ է Հայաստանի ազգային օլիմպիական կոմիտեի կատարած աշխատանքներից և խոստացել առաջիկայում այցելել Հայաստան:
Եվրոպայի օլիմպիական կոմիտեի համաժողովի մասնակիցներին Վատիկանում ընդունել է նաև Նորին Սրբություն Հռոմի Պապ Ֆրանցիսկոսը:
ՀԱՕԿ նախագահը պաշտոնական հանդիպումներ է ունեցել նաև Կիպրոսի, Էստոնիայի, Լեհաստանի, Սլովակիայի, Լատվիայի և Լիտվայի ազգային օլիմպիական կոմիտեների նախագահների հետ: Մինչ այս Հայաստանի ազգային օլիմպիական կոմիտեի նախագահ Գագիկ Ծառուկյանը փոխշահավետ համագործակցության պայմանագրեր էր կնքել նաև Ռուսաստանի, Վրաստանի, Մոլդովայի և Բելառուսի օլիմպիական կոմիտեների հետ:
