Հայաստանի Ազգային ժողովի ՀՀԿ խմբակցության պատգամավոր Արմեն Աշոտյանը վաղաժամ է համարում հայտարարությունները, թե Հայաստանի Հանրապետական կուսակցությունը լքում է հայաստանյան քաղաքական դաշտը: Մայիսի 8-ին կայացած մամուլի ասուլիսի ընթացքում Արմեն Աշոտյանն ընդգծեց, որ նման հայտարարությունները չեն բխում ներկայիս քաղաքական իրողություններից: «Մեր ընդդիմախոսներն իրենք են պնդում, որ մեր շարքերում կան անձինք, ովքեր կարող օգտակար լինել Հայաստանի տնտեսական, քաղաքական, սոցիալական ոլորտներում: Հանրապետական կուսակցությունը առաջին հերթին ցույց տվեց իր կոնսոլիդացված դերը որպես ընդդիմություն, երկրորդ հերթին մեզ հաջողվեց պահպանել կուսակցական միատարր կառուցվածքը և երրորդ հերթին մենք կգտնենք մեր տեղը Հայաստանում ստեղծված նոր քաղաքական իրավիճակում: Այդ տեղը, եթե իշխանության մեջ չէ, ապա ընդդիմության մեջ է», ընդգծեց Աշոտյանը:
Նրա գնահատմամբ՝ ժողովրդավարություն կառուցող և բազմակարծության ձգտող երկրում ընդդիմությունը պատվավոր և պատասխանատու տեղ է: «Ես կարծում եմ՝ յուրաքանչյուր իշխանություն, որը վայելում է հանրության աջակցությունը, միևնույնն է ընդդիմության կարիքն ունենալու է», – նշեց Աշոտյանը:
Արմեն Աշոտյանը շեշտեց, որ իրենք պատրաստ են դառնալ ընդդիմություն և բարձրաձայնել բոլոր խնդիրների մասին: Նրա խոսքով՝ իրենք լինելու են կառուցողական ընդդիմություն:
Նա հավելեց, որ նոր կառավարությունը պետք է համարժեք և հնարավորինս արագ իրականացնի բնակչության ակնկալիքները կամ դա նոր հիասթափություն կառաջացնի: «Մենք չենք հանդուրժի նոր կառավարության անհաջողությունները, մենք մտադիր ենք քննադատել նրանց», – ասել է նա:
Պատգամավորի գնահատմամբ՝ շատ կարևոր է բոլոր քաղաքական խաղացողների համար ընտրություններին հավասար հասանելիություն ապահովելը:
