Ռուսաստանի նախագահ Վլադիմիր Պուտինը ստորագրել է հեղուկ բնական գազի արտահանման լիբերալիզացման մասին օրենք, որն ուժի մեջ է մտել դեկտեմբերի 1-ից: 2006թ. «Գազպրոմ»-ին էր տրվել ցանկացած մեթանի արտահանման մենաշնորհ, որը պատրաստվում էր երկու խոշոր գազամուղ կառուցել Եվրոպայում՝ «Հյուսիսային հոսք» և «Հարավային հոսք»: Այս մասին հաղորդում է «Վեդոմոստի»-ն:
«Գազպրոմ»-ը ցանկացել է գրավել հեղուկ գազի համաշխարհային շուկայի մինչև ¼-ը: Տարբեր ժամանակներում նա հայտարարել է մի քանի գործարանների կառուցման մտադրության մասին, սակայն ընկերությունն այդպես էլ չսկսեց որևէ կոնցեռնի շինարարություն:
2005-2012թ. հեղուկ բնական գազի արտադրության հզորությունն աշխարհում 170 միլիոնից դարձավ 280 միլիոն տոննա, իսկ առևտուրը՝ 130 միլիոնից մինչև 235 միլիոն տոննա: Միաժամանակ թերթաքարային հեղափոխության շնորհիվ ԱՄՆ-ը կարողացավ իրեն ապահովել էժան գազով և այժմ պատրաստվում է արտահանել «Գազպրոմ»-ի համար առաջնային Եվրոպայի և Ասիայի շուկաներ:
«Գազպրոմ»-ի մենաշնորհը չեղյալ հայտարարելու նախադրյալներն ի հայտ են եկել 2009թ., երբ Yamal LNG-ի բաժնետոմսերի մեծ մասը՝ Հարավային Տամբեյի հանքավայրի լիցենզիայով, ձեռք բերեց Գենադի Տիմչենկոն, ով այդ ժամանակվա վարչապետ Վլադիմիր Պուտինի հին ծանոթներից էր: Այդ ակտիվը նա վաճառեց «Նովատեկ» ընկերությանը՝ այնուհետև դառնալով ընկերության խոշորագույն բաժնետերը: Ավելի ուշ Տիմչենկոն առաջարկել էր չեղյալ հայտարարել «Գազպրոմ»-ի մենաշնորը, գաղափարին աջակցել էր նաև «Ռոսնեֆտ»-ի նախագահ Իգոր Սեչինը:
Պուտինը լսելով փաստարկները՝ 2013թ. փետրվարին էներգետիկայի նախարարությանը հանձնարարում է ուղղումներ պատրաստել համապատասխան օրենքի համար, որի վրա աշխատանքը տևում է շուրջ 8 ամիս:
Հաջորդ քայլը կարող է դառնալ այն, որ «Գազպրոմ»-ը կզրկվի նաև խողովակաշարային արտահանման մենաշնորհից՝ կարծում է East European Gas Analysis-ի տնօրեն Միխայիլ Կորչեմկինը: Օրինակ՝ «Ռոսնեֆտ»-ը հետաքրքրված է Չինաստան խողովակաշարով գազի մատակարարմամբ: Դա շահավետ է նաև Եվրոպայի համար, որտեղ «Գազպրոմ»-ը նոր խողովակների օգտագործման սահմանափակում ունի՝ կարծում է «Սկոլկովո» էներգետիկ բիզնես-դպրոցի տնօրեն Գրիգորի Վիգոնը:
