Ռուսաստանը արդեն իսկ քայլեր է ձեռնարկել, որպեսզի մինչև Մաքսային միությանը անդամակցելը Հայաստանի տնտեսության համար նպաստավոր պայմաններ ստեղծվեն: «Ազատություն» ռադիոկայանի փոխանցմամբ՝ այս մասին այսօր հայտարարել է Ռուսաստանի նախագահ Վլադիմիր Պուտինը՝ Հայաստանի նախագահի նստավայրում կայացած ասուլիսի ժամանակ:
«Մենք գործնական քայլեր ենք ձեռնարկել, որպեսզի Հայաստանի համար վիճակը լինի բարենպաստ անգամ մինչև անդամակցությունը։ Օրինակ՝ գազի գնի հաշվարկման այն մեխանիզմը, որի մասին խոսվեց՝ հազար խորանարդի դիմաց 189 դոլար: Մինչդեռ, պատկերացրեք՝ Եվրոպայում գինը 500 դոլար է: Սա՝ առաջինը: Երկրորդ՝ որպես ՀԱԿՊ անդամ Հայաստանը զենք կստանա Ռուսաստանի ներքին գներով: Նույնը վերաբերում է նաև նավթամթերքին․ մենք միակողմանիորեն հանում են 30 տոկոս կազմող արտահանման մաքսատուրքը», – մասնավորապես, ասաց Ռուսաստանի նախագահը:
Վլադիմիր Պուտինը նկատել է, թե այս ամենի արդյունքում Ռուսաստանի բյուջեն կզրկվի նշանակալի գումարներից, բայց փոխարենը՝ նպաստավոր պայմաններ կստեղծվեն Հայաստանի տնտեսության զարգացման համար: Պատասխանելով ռուս լրագրողի այն հարցին, թե ե՞րբ կարող է Հայաստանը անդամակցել Մաքսային միությանը, Պուտինն ասաց, թե կոնկրետ ժամկետներ նշել չի կարող, բայց Ռուսաստանը իրենից կախված ամեն ինչ կանի, որպեսզի անդամակցությունը հնարավորինս արագ լինի․ – «Չեմ թաքցնի՝ ի զարմանս մեզ, հայկական կողմը գործում է շատ եռանդուն և ցույց է տալիս պրոֆեսիոնալիզմի բարձր մակարդակ, ինչը, անկեղծ ասած, մեզ դնում է որոշակի ծանր դրության մեջ: Մենք նույնիսկ չենք հասցնում մեր հայ գործընկերների հետևից: Մենք կանենք ամեն ինչ, որպեսզի Հայաստանի լիիրավ անդամակցությունը Մաքսային միությանը իրականություն դառնա հնարավորինս արագ: Ես կխուսափեի նշել հստակ ժամկետներ, քանի որ դա կախված է ոչ միայն մեզանից այլև մեր գործընկերներից՝ Ղազախստանից և Բելառուսից, բայց Ռուսաստանը իրենից կախված ամեն ինչ կանի, որպեսզի Հայաստանի անդամակցությունը հնարավորինս արագ լինի»։
Հայաստանյան հեռուստաընկերություններից մեկը հարց է հնչեցրել, թե ինչպիսի՞ն կլինի Ռուսաստանի արձագանքը, եթե Ադրբեջանի կողմից հնչող ռազմատենչ հայտարարությունները իրականություն դառնան: Վլադիմիր Պուտինը դիվանագիտորեն շրջանցել է այս հարցը, ասելով, որ եթե շատ այդ մասին խոսեն, ապա խաղաղ կարգավորման հնարավորությունները կնվազեն:
«Մենք կցանկանայինք, որ Ռուսաստանի սահմաններին այդքան մոտ գտնվող և Ռուսաստանի հետ այդչափ սերտ հարաբերություններ ունեցող այս տարածաշրջանում երբեք այլևս արյուն չթափվի՝ ո՛չ Հայաստանի, ո՛չ էլ Ադրբեջանի քաղաքացիների: Մենք հենց դրա վրա էլ աշխատում ենք: Ենթադրաբար ասել, թե ինչ կանենք մենք, եթե սկսվի պատերազմ, իմ կարծիքով, լավ արդյունքների չի բերի: Կստացվի, որ մենք պատրաստվում ենք պատերազմի, իսկ մենք պետք է հասնենք նրան, որ, ինչպես Հայաստանի նախագահը նշեց, բոլոր վիճելի հարցերը լուծվեն բացառապես դիվանագիտության միջոցներով: Մենք դրան էլ ձգտելու ենք», – ասել է Վլադիմիր Պուտինը:
Մանրամասները՝ «Ազատություն» ռադիոկայանի կայքէջում
