Եվրանեսթում հայաստանյան պատվիրակությունն առաջարկել է Եվրանեսթի աշնանային նստաշրջանն անցկացնել Երևանում, ինչին, սակայն, ադրբեջանական կողմը արդեն իսկ ներկայացրել է իր առարկությունները:
Եվրանեսթում հայկական պատվիրակության անդամ, ԱԺ ՀՅԴ խմբակցության պատգամավոր Լիլիթ Գալստյանն «Առաջին լրատվականի» հետ զրույցում տեղեկացրեց, որ հայկական կողմն ավելի վաղ էր նման առաջարկով դիմել Եվրանեսթի ղեկավար կազմին. «Որպես Եվրանեսթի լիարժեք անդամ` ցանկացած երկիր կարող է իր առաջարկությունն անել այս կամ այն երկրում նիստ անելու վերաբերյալ, և քանի որ առաջիկա նիստը պետք է տեղի ունենար սեպտեմբերին, իսկ սեպտեմբերին մեր անկախության 20-րդ տարեդարձն է, մենք համոզում ունեինք, որ դա լավ առիթ է տարբեր երկրների խորհրդարանական մեր գործընկերներին հրավիրել Հայաստան` թե՛ գործնական մեր նիստը կազմակերպելու իմաստով, թե՛ նաև ականատեսը լինելու մեր պետականության անկախության 20 տարիների ձեռքբերումներին»:
Գալստյանը նկատեց, որ այս անգամ էլ ադրբեջանական կողմը առիթը բայց չթողեց հերթական հիստերիան բարձրացնելու և հարցը քաղաքական շահարկման առիթ դարձնելու համար: Գալստյանը տեղեկացրեց, որ ադրբեջանական կողմը որպես պատճառաբանություն ներկայացրել է անվտանգության հետ կապված խնդիրները, ինչը սակայն հայկական կողմը նախապես հավաստիացրել է, որ երաշխավորելու է: Պատգամավորի գնահատմամբ, ադրբեջանական կողմը բոլոր միջազգային կառույցներն օգտագործում է մերժելու տարածաշրջանային ձեռնարկներում հայկական նախաձեռնությունները, և այդ պարագայում կովկասյան ձևաչափի գործընթացներում միշտ նախընտրելի է դառնում Վրաստանը` իր չեզոքության պատճառով:
Նկատենք, որ Եվրանեսթի խորհրդարանական վեհաժողովը դեռևս որոշում չի կայացրել, թե արդյոք համաձայն է լիագումար նիստը Հայաստանում անցկացնելու առաջարկին, սակայն, ըստ Լիլիթ Գալստյանի, հաշվի առնելով նախադեպերը, ամենայն հավանականությամբ Հայաստանի առաջարկը կմերժվի:
Դաշնակցական պատգամավորի դիտարկմամբ, որպես նորաստեղծ կառույց` Եվրանեսթը կխուսափի կոնֆլիկտներով սկսելու իր գործունեությունը, ինչպես նաև եվրոպական կառույցների մոտ ընդունված մոտեցում է հակամարտող կողմերին հավասարաչափ նայելը, չնեղացնելը կամ կրկնակի ստանդարտներով վերաբերվելը, ինչն այս խնդրի դեպքում ևս կկիրառվի: