2014թ. հետո Կանադան չի մասնակցի ՆԱՏՕ-ի որևէ առաքելությանը Աֆղանստանում: Ինչպես հաղորդում է ITAR¬ TASS-ը, այս մասին հայտարարել է Կանադայի պաշտպանության նախարարության ներկայացուցիչ փոխգնդապետ Կրիս Լիմեյը:
«Կանադայի ռազմական ներկայությունն Աֆղանստանում ավարտվել է: Եվ մենք հստակ հասկացրել ենք, որ չենք մասնակի ՆԱՏՕ-ի մյուս առաքելությանն այս երկրում»,- ասել է նա:
Կանադան դադարեցրել է մասնակցել մարտական գործողություններին Աֆղանստանում 2011թ. հուլիսին և հինգ ամիս հետո դուրս է բերել իր զորակազմը (2800 մարդ) երկրից: Փոխարենը Աֆղանստան են ուղարկվել 950 ռազմական հրահանգիչներ, որոնք կնախապատրաստեն աֆղան զինվորներին և անվտանգության ուժերին:
Վարչապետ Սթիվեն Հարփերի կառավարությունը պարտավորվել է նրանց Աֆղանստանից դուրս բերել փուլ առ փուլ մինչև 2014թ. մարտի վերջ:
2001-2011թթ. աֆղանական պատերազմին մասնակցել է շուրջ 40 հազար կանադացի զինծառայող, զոհվել է նրանցից 158-ը, վիրավորվել` 2000-ը: Պատերազմը կանադացի հարկատուներին արժեցել է 11.3 միլիարդ դոլար:
Կանադան խոստացել է 2014թ. հետո երեք տարի շարունակ Քաբուլին տարեկան 110 միլիոն դոլար հատկացնել անվտանգության ուժերի պահպանման համար:
